ନୂଆପଡା: ଧୂପଦୀପ, ପାରମ୍ପରିକ ବାଦ୍ୟରେ କମ୍ପୁଛି ସାରା ପରିବେଶ । ବେକରେ ମନ୍ଦାର ମାଳ, ହାତରେ ଢୋଲ ନିଶାନ । ଏହି ବାଦ୍ୟର ତାଳେତାଳେ ନାଚକରୁଛନ୍ତି ସମସ୍ତେ । ଏପରିକି ଶରୀରରକୁ କଷ୍ଟ ଦେଇ ଭକ୍ତ ନିଜକୁ ସମର୍ପି ଦେଇଛି ଇଷ୍ଟ ଦେବୀଙ୍କ ପାଖରେ । ସୁଉଚ୍ଚ ନୀଳ ପର୍ବତମାଳ ଛାତିରେ ଚକୋଟିଆ ଭୁ଼ଞ୍ଜିଆ ପହରିଆ ସମ୍ପ୍ରଦାୟର ଅଧିଷ୍ଠାତ୍ରୀ ଦେବୀ ମାଁ ସୁନାଦେଇଙ୍କ ଛତର ଯାତ୍ରା ସମ୍ପନ୍ନ ହୋଇଯାଇଛି ।
ଛତର ଯାତ୍ରାକୁ ଦେଖିବା ପାଇଁ ଓଡିଶା ସମେତ ଛତିଶଗଡ, ମଧ୍ୟପ୍ରଦେଶ, ଆନ୍ଧ୍ରପ୍ରଦେଶ ରାଜ୍ୟରୁ ହଜାର ହଜାର ଶ୍ରଦ୍ଧାଳୁଙ୍କ ଜନସମୁଦ୍ର ଦେଖାଦେଇଛି । ଛତର ଯାତ୍ରା ଦିନ ମା' ଙ୍କୁ ଦର୍ଶନ କଲେ ମନସ୍କାମନା ପୂରଣ ହୋଇଥାଏ ବୋଲି ଶ୍ରଦ୍ଧାଳୁଙ୍କ ଯୁଗେଯୁଗେ ବିଶ୍ଵାସ ରହିଛି ।
ମାନସିକ ପୂରଣ ପାଇଁ ବୋଦାବଳୀରେ ରକ୍ତରଞ୍ଜିତ ହୋଇଯାଇଛି ଏହି ପୀଠ । ମାଓବାଦୀଙ୍କ ବନ୍ଧୁକ ମୁନକୁ ଖାତିରି ନକରି 3 ହଜାର ବର୍ଗଫୁଟ ଉଚ୍ଚ ପର୍ବତମାଳା ଚଢି ମା' ଙ୍କ ଚରଣରେ ଅଧିଆ ପଡିଛନ୍ତି ଆବାଳ ବୃଦ୍ଧବନିତା । ଭକ୍ତଙ୍କ ସୁରକ୍ଷାକୁ ଦୃଷ୍ଟି ଆଗରେ ରଖି ବ୍ୟାପକ CRPF, SOG, DVF ଯବାନ ମୁତୟନ କରାଯାଇଥିଲା ।
ପରମ୍ପରା ଅନୁଯାୟୀ ଛତର ଯାତ୍ରା ଆରମ୍ଭ ପୂର୍ବରୁ ଆଶ୍ଵିନ ମାସ ଆମାବାସ୍ୟା ଦିନଠାରୁ ମା' ଙ୍କ ଆହ୍ଵାନ ପାଇଁ ପୀଠରେ ଅଖଣ୍ଡ ଦୀପ ପ୍ରଜ୍ଜଳନ କରାଯାଏ । ଦୀପ ପ୍ରଜ୍ଜଳନ ଏବଂ ନିଷି ପୂଜା କୁମାର ପୂର୍ଣ୍ଣିମା ପର୍ଯ୍ୟନ୍ତ ଚାଲୁ ରହିଥାଏ । ଏହାପରେ 84 ଗୋଟି ଟିକ୍ରୀରୁ ଗୌତିଆ ସେବକ ମାନଙ୍କୁ ନିମନ୍ତ୍ରଣ କରାଯାଏ ।
ବାଜା ବାଲା, ବାଡିବାଲା, ଚ୍ଛତ୍ରିଆ, ଶିରାଚାଳିଶା ଆଦି ମୁଖ୍ୟ ସେବକ ମାନେ ମା'ଙ୍କ ଛତର ଯାତ୍ରା ଆୟୋଜନ କରିଥାନ୍ତି । ଏହାପରେ ଛତର ଦେହରେ ମା’ ଆବିର୍ଭାବ ହୋଇ 84 ଗୋଟି ଟିକ୍ରିକୁ ପରିଭ୍ରମଣ କରନ୍ତି । ସାମ୍ପ୍ରତିକ ସରକାର ବଳିପ୍ରଥାକୁ ନିଷେଧ କରିଥିବାବେଳେ କାହିଁ କେଉଁ ଆବାହାନ କାଳରୁ ବଳୀ ପ୍ରଥା ସୁନାଦେଇ ପୀଠରେ ବଳବତ୍ତର ରହିଛି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ
