ନୂଆପଡା: ଜଙ୍କ ଥାନା ପୋଲିସ ହାତରେ ଧରାପଡିଲେ 2ଜଣ ବାଇକ ଲୁଟେରା । ଗିରଫ 2ଜଣଙ୍କ ମଧ୍ୟରେ ଜଣେ ନାବାଳକ ଓ ଅନ୍ୟଜଣକ ହେଲେ ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ଥାନା ଅନ୍ତର୍ଗତ ଚଟୁଅନକା ଗାଁର ବିନୁ ଅଦା ।
ଶୁକ୍ରବାର ମଧ୍ୟରାତ୍ରିରେ ଖରିଆରୋଡ ଥାନା ଆଇଆଇସି ଯୁଗଳ କିଶୋର ମଲ୍ଲିକ ସହରର ଇରାନୀ ସାହି ଅଞ୍ଚଳରେ ପାଟ୍ରୋଲିଂ କରୁଥିଲେ । ସେତେବେଳେ ଜଣେ ଅଜଣା ଯୁବକ ଗୋଟିଏ ବାଇକ ଧରି ଥିବା ଦେଖି ସେହି ଯୁବକ ଜଣଙ୍କୁ ପଚରାଉଚରା କରିଥିଲେ । ପରେ ଯୁବକ ଉପରେ ଅଧିକ ସନ୍ଦେହ ହୋଇଥିବାରୁ ଥାନାକୁ ଆଣି ତଦନ୍ତ କରିଥିଲେ । ସେଠାରୁ ଜଣାପଡିଲା ଯେ ଯୁବକ ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ଥାନା ଅନ୍ତର୍ଗତ ଚଟୁଅନକା ଗାଁର । ସେ ଧରିଥିବା ମୋଟର ସାଇକଲ ଚୋରୀ କରି ଆଣିଥିଲେ ।
ବାଇକ ଚୋରି କରିବା ପାଇଁ ତାଙ୍କର ଆଠ ଜଣିଆ ଦଳ ରହିଥିବା ପୋଲିସକୁ ତଥ୍ୟ ମିଳିଛି । ପୋଲିସ ତଥ୍ୟ ଆଧାରରେ ବିଭିନ୍ନ ସ୍ଥାନରେ ଚଢାଉ କରି ଆଠ ଗୋଟି ମୋଟର ସାଇକେଲ ଜବତ କରିବା ସହ ଆଉ ଜଣେ ନାବାଳକକୁ ଅଟକ ରଖିଛି । ଶନିବାର ବାଇକ ଚୋର ବିନୁ ଅଦାକୁ କୋର୍ଟ ଚାଲାଣ କରିଥିବା ବେଳେ ନାବାଳକ ଅଭିଯୁକ୍ତକୁ ଅଟକ ରଖି ଅଧିକ ତଦନ୍ତ ଚଳାଇଛି ପୋଲିସ ।
ଖୁବ ଶୀଘ୍ର 6ଜଣ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଅତିରିକ୍ତ ଆରକ୍ଷୀ ଅଧିକ୍ଷକ ସୁନୀଲ କୁମାର ଆଚାର୍ଯ୍ୟ ସୂଚନା ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ
