ନୟାଗଡ଼: ଧାନ ଅମଳ ସମୟରେ ବାରହା ନଷ୍ଟ କରିବାରେ ଲାଗିଛନ୍ତି l ଦିନେ କି ଦୁଇଦିନ ନୁହେଁ ବିଗତ ଏକ ମାସ ହେବ ମାତିଛନ୍ତି ବାର୍ହା ପଲ। ନିଜ ରକ୍ତକୁ ପାଣି କରି ସୁନାର ଫସଲ କରିଥିବା ଚାଷୀଟିଏ ଏବେ ବାର୍ହା ଉପଦ୍ରବର ଶିକାର ହୋଇ ସରକାରୀ ସହାୟତାକୁ ଅପେକ୍ଷା କରିଛି l ନୟାଗଡ଼ ଜିଲ୍ଲା ଏକ ବଣ ଜଙ୍ଗଲ ଘେରା ଜିଲ୍ଲା ହୋଇଥିବାରୁ ଜଙ୍ଗଲୀ ବାରହାଙ୍କ ସଂଖ୍ୟା ବହୁତ ରହିଛି l ନୟାଗଡ଼ର 8 ଟି ବ୍ଲକରେ ବାରହା ଉପଦ୍ରଵ କରୁଛନ୍ତି l ଏକର ଏକର ଧାନ କ୍ଷେତ ନଷ୍ଟ କରୁଥିଲେ ବି ସରକାରୀ ସହାୟତା ମିଳୁନି l ଫଳରେ ହତାଶ ହେଉଛି ଚାଷୀ l
ରଣପୁର ବ୍ଲକ ଅଧୀନ ରାଜସୁନାଖଳା ଗ୍ରାମପଂଚାୟତ କୋଟଗଡ଼ ଗ୍ରାମର ଅନେକ ଚାଷୀ କଷ୍ଟରେ ଧାନ ଫସଲ କରିଥିବା ବେଳେ ଏବେ ଧାନ ଅମଳ ସମୟରେ ଜଙ୍ଗଲୀ ବାର୍ହା ଆସି ଫସଲକୁ ନଷ୍ଟ କରୁଥିବା ଅଭିଯୋଗ ହେଉଛି । ଏହି ଜଙ୍ଗଲୀ ଜନ୍ତୁଙ୍କ ପାଦ୍ରୁଭାବରୁ ରକ୍ଷା ପାଇବା ପାଇଁ ଗ୍ରାମବାସୀ ପାଳି କରି ଫସଲ ଜଗୁଥିଲେ ମଧ୍ୟ କୌଣସି ଲାଭ ମିଳୁନଥିବା ଚାଷୀ କହିଛନ୍ତି l
ସେହିପରି ଜଙ୍ଗଲ ବିଭାଗର ଅଧିକାରୀଙ୍କୁ ଜଣାଇଲେ ମଧ୍ୟ କିଛି ସୁଫଳ ମିଳୁନି । ତେବେ ବର୍ଷକର ଫସଲ ବାର୍ହାଙ୍କ ପାଇଁ ଉଜୁଡି ଯାଉଥିବାରୁ ଦେଖି ସରକାରୀ ସହାୟତା ପାଇଁ ଆଶା ବାନ୍ଧି ବସିଛି ଚାଷୀ l
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
