ନବରଙ୍ଗପୁର: ଗତ ସପ୍ତାହେ ହେଲା ନବରଙ୍ଗପୁର ଜିଲ୍ଲାରେ ବଢିଛି ତାପମାତ୍ରା । ପ୍ରବଳ ଖରା ,ଗରମ ଓ ଗୁଳୁଗୁଳିରେ ଅସ୍ତବ୍ୟସ୍ତ ହୋଇ ପଡିଛନ୍ତି ସାଧାରଣ ଜନତା । ଏତେ ମାତ୍ର।ରେ ଗରମ ହେଉଛି ଯେ ଯାହା ସହିବା ସାଧାରଣ ଲୋକଙ୍କ ପାଇଁ ମୁସ୍କିଲ ହୋଇପଡିଛି । ସକାଳ 10 ଟା ହେବା ମାତ୍ରକେ ଘରୁ ବାହାରି ହେଉନଥିବାବେଳେ ଶ୍ରମିକ ଓ କୁଲି ମଜୁରିଆମାନେ କାମ କରିବାକୁ ବାଧ୍ୟ ହେଉଛନ୍ତି । ସମସ୍ତେ ପ୍ରଚଣ୍ଡ ରୌଦ୍ରତାପରେ ଅତିଷ୍ଠ ହୋଇ ପଡିଥିବାବେଳେ କାଳ ବୈଶାଖୀକୁ ଅପେକ୍ଷା କରିଛନ୍ତି ଜିଲ୍ଲାବାସୀ ।
ଜୋରରେ ଗରମ ପବନ ବହୁଥିବାବେଳେ ଗୁଳୁଗୁଳିରେ ଅତିଷ୍ଠ ହେଉଛନ୍ତି ଲୋକେ । ବିଦ୍ୟୁତ କାଟ ସାଙ୍ଗକୁ ପ୍ରବଳ ଖରା ସମସ୍ତଙ୍କୁ ଦିନ ତମାମ ଛଟପଟ କରୁଛି । ଗାଁ ଅପେକ୍ଷା ସହରରେ ଗ୍ରୀଷ୍ମ ପ୍ରଭାବରେ ପେଶୀ ହୋଇ ଯାଉଛନ୍ତି ସହରୀ ବାସିନ୍ଦା । ପଙ୍ଖା, କୁଲର ଓ ଏସି କାମକୁ ଆସୁ ନଥିବାବେଳେ ଆଖୁ ରସ ଓ ଅନ୍ୟାନ୍ୟ ଥଣ୍ଡା ପାନୀୟ ପିଇ ଖରାକୁ ମୁକାବିଲା କରୁଛନ୍ତି ଲୋକେ ।
ନଦୀ ନାଳ ଓ ପାଇପ ଗୁଡିକରେ ଜଳସ୍ତର କମିଯାଇଥିବା ଦେଖିବାକୁ ମିଳିଛି । ଆଉ କିଛି ଦିନ ମଧ୍ୟରେ ଚାଷୀ ଜଳକଷ୍ଠରେ ପ୍ରଭାବିତ ହେବାର ଆଶଙ୍କା ଥିବାବେଳେ ଟିକିଏ ଗଛ ଛାଇରେ ଅଟକି ଯାଉଥିବା ଦୃଶ୍ୟ ହିଁ ବୟାନ କରୁଛି ନବରଙ୍ଗପୁର ଜିଲ୍ଲାରେ କେତେ ଭୟାନକ ପାଲଟିଛି ଖରା ।
ନବରଙ୍ଗପୁର ତପନ କୁମାର ବିଷୋୟୀ, ଇଟିଭି ଭାରତ
