ନବରଙ୍ଗପୁର: ଜାତୀୟ ମହିଳା କମିଶନ ସଦସ୍ୟ ଚନ୍ଦ୍ରମୁଖୀ ଦେବୀଙ୍କ ନବରଙ୍ଗପୁର ଗସ୍ତ । ଏହି ଗସ୍ତ ସମୟରେ ସେ ଜିଲ୍ଲାର ବିଭିନ୍ନ ଅଞ୍ଚଳ ପରିଦର୍ଶନ କରିବା ସହ ମହିଳାଙ୍କ ଉନ୍ନତି ପାଇଁ କେନ୍ଦ୍ର ଏବଂ ରାଜ୍ୟ ସରକାର ପ୍ରଣୟନ କରିଥିବା ବିଭିନ୍ନ ଯୋଜନାର ସମୀକ୍ଷା କରିଥିଲେ ।
ଉକ୍ତ ଯୋଜନାର ସମୀକ୍ଷା ପରେ କାର୍ଯ୍ୟକାରିତା ନେଇ ସେ ଜିଲ୍ଲା ସ୍ତରୀୟ ବିଭିନ୍ନ ବିଭାଗର କର୍ମଚାରୀଙ୍କ ସହ ରୁଦ୍ଧଦ୍ବାର ସମୀକ୍ଷା ବୈଠକ କରିଥିଲେ । ବୈଠକ ପରେ ଗଣମାଧ୍ୟମରେ ଚନ୍ଦ୍ରମୁଖୀ ଦେବୀ ଏସମ୍ପର୍କରେ ସୂଚନା ଦେଇଥିଲେ । ନବରଙ୍ଗପୁର ଭଳି ଆଦିବାସୀ ଅଧ୍ୟୁଷିତ ଓ ନକ୍ସଲ ପ୍ରଭାବିତ ଅଞ୍ଚଳରେ ସରକାରୀ ଯୋଜନା କିପରି ଭାବେ କାର୍ଯ୍ୟକାରୀ ହେବ ସେ ସମ୍ପର୍କରେ ଆଲୋକପାତ କରିଥିଲେ । ଏଥିସହିତ ସେ କେନ୍ଦ୍ର ସରକାରଙ୍କ ମହତ୍ବକାଂକ୍ଷୀ ଯୋଜନା 'ବେଟି ବଚାଓ, ବେଟି ପଢାଅ' ଯୋଜନା ନବରଙ୍ଗପୁରରେ କାର୍ଯ୍ୟକାରୀ ହୋଇପାରିନଥିବା କହିଥିଲେ । ଜିଲ୍ଲାଟି ନାରୀ ଶିକ୍ଷା କ୍ଷେତ୍ରରେ ପଛରେ ପଡିଯାଇଥିବା ବେଳେ ଏହି ଯୋଜନା କାର୍ଯ୍ୟକାରୀ ହେଲେ ଜିଲ୍ଲାର ସମସ୍ତ ବାଳିକାଙ୍କୁ ଶିକ୍ଷା ମିଳିବାରେ ବେଶ ସହାୟକ ହୋଇପାରିବ ବୋଲି ପ୍ରକାଶ କରିଥିଲେ ।
ସେହିପରି ଜିଲ୍ଲାରେ ଥିବା ଅଙ୍ଗନବାଡି କେନ୍ଦ୍ରରେ କର୍ମୀମାନେ ଠିକ୍ରେ କାର୍ଯ୍ୟକୁ ଆସୁଛନ୍ତି କି ନାହିଁ ତାହା ଜାଣିବାକୁ ସେମାନଙ୍କ ମୋବାଇଲ ଟ୍ରାକ କରିବା ପାଇଁ କହିଥିଲେ । ଯଦ୍ବାରା ସରକାରୀ ଯୋଜନାର ସୁଫଳ ତୃଣମୂଳ ସ୍ତର ପର୍ଯ୍ୟନ୍ତ ପହଞ୍ଚିପାରିବ ବୋଲି କହିଥିଲେ । ଜିଲ୍ଲାରେ ବାଲ୍ୟ ବିବାହ ପ୍ରଥା ଓ ନିଶା ସେବନ ବହୁଳ ପରିମାଣରେ ଚାଲୁଥିବାରୁ ଏହାକୁ ସଚେତନତା ମାଧ୍ୟମରେ ରୋକିବା ପାଇଁ ବିଭିନ୍ନ ସ୍କୁଲକୁ ଯାଇ ସଚେତନତାମୂଳକ କାର୍ଯ୍ୟକ୍ରମ କରିବାକୁ ଜିଲ୍ଲା ସ୍ତରୀୟ ଅଧିକାରୀଙ୍କୁ ପରାମର୍ଶ ଦେଇଥିଲେ । ତେବେ ଆଗାମୀ ଦିନରେ ଜିଲ୍ଲାରେ ପହଞ୍ଚି ପାରିନଥିବା ବିଭିନ୍ନ ଯୋଜନା ଏବଂ ଜିଲ୍ଲାରେ ଆବଶ୍ୟକ ଥିବା ନୂତନ ଯୋଜନା ସମ୍ପର୍କରେ ରାଜ୍ୟସରକାରଙ୍କ ସହ ଆଲୋଚନା କରିବେ ବୋଲି କହିଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
