ନବରଙ୍ଗପୁର: ଜିଲ୍ଲାରେ ବଢୁଥିବା କୋରୋନା ସଂକ୍ରମଣକୁ ଦୃଷ୍ଟିରେ ରଖି ଜିଲ୍ଲାରେ ଦୁଇ ଦିନିଆ ସଟଡାଉନ ଘୋଷଣା କରିଛନ୍ତି ଜିଲ୍ଲାପାଳ । ଏହି ଘୋଷଣା ଅନୁଯାୟୀ ଅଗଷ୍ଟ 1 ତାରିଖ ସକାଳ 5ଟାରୁ 2 ତାରିଖ ମଧ୍ୟ ରାତ୍ର ପର୍ଯ୍ୟନ୍ତ ସଟଡାଉନ ଲାଗୁ ରହିବ । ଏନେଇ ଏକ ପ୍ରେସ ବିଜ୍ଞପ୍ତି ମାଧ୍ୟମରେ ଜିଲ୍ଲାପାଳ ସୂଚନା ଦେଇଛନ୍ତି । ସଟଡାଉନ ସମୟରେ ସମସ୍ତ ଅତ୍ୟାବଶ୍ୟକୀୟ ସେବା ଜାରି ରହିବା ନେଇ ବିଜ୍ଞପ୍ତିରେ ସୂଚନା ଦିଆଯାଇଛି । ଏଥିସହ ରାସନ ସାମଗ୍ରୀ ଦୋକାନ, ପନିପରିବା ଓ କ୍ଷୀର ଦୋକାନ ସକାଳ 6 ଟାରୁ ଦିନ 1ଟା ଯାଏଁ ଖୋଲା ରହିବା ନେଇ ସ୍ପଷ୍ଟ ହୋଇଛି ।
ତେବେ ଜରୁରୀକାଳୀନ ସେବା ଯୋଗାଉଥିବା ସଂସ୍ଥା ତଥା ପ୍ରତିରକ୍ଷା ପ୍ରତିଷ୍ଠାନ ଆଦି ସଟଡାଉନ ସମୟରେ ମଧ୍ୟ ଖୋଲା ରହିବ । ପୋଷ୍ଟ ଅଫିସ ସମେତ କେନ୍ଦ୍ର ସଶସ୍ତ୍ର ବାହିନୀ ପ୍ରତିଷ୍ଠାନ ଆଦି ମଧ୍ୟ ଖୋଲା ରହିବାକୁ ଥିବା ବେଳେ କେନ୍ଦ୍ର ଓ ରାଜ୍ୟ ସରକାରୀ କର୍ମଚାରୀ ଗମନାଗମନ କରିପାରିବେ । ଟେଲିକମ କ୍ଷେତ୍ରରେ କାମ କରୁଥିବା କର୍ମଚାରୀ ମଧ୍ୟ ଚଳପ୍ରଚଳ କରିପାରିବେ । ଅନୁମତିପ୍ରାପ୍ତ ଗଣମାଧ୍ୟମ ପ୍ରତିନିଧିମାନେ ଯାତାୟତ କରିପାରିବେ ।
ସେହିପରି ପାନୀୟ ଜଳ, ପରିମଳ ବିଭାଗର କର୍ମଚାରୀମାନେ ବିନା ଅସୁବିଧାରେ ଯାତାୟତ କରିପାରିବେ । ଶକ୍ତି ବିଭାଗରେ କାର୍ଯ୍ୟରତ କର୍ମଚାରୀ ଯାତାୟାତ କରିପାରିବେ । ମାଲବାହି ସାମଗ୍ରୀର ଗାଡି ଯାତାୟାତ କରିପାରିବ । କୃଷି, କୃଷିଜାତ ଦୋକାନ, ଗୋଖାଦ୍ୟ ଓ ପଶୁ ସମ୍ପଦ ଦୋକାନ, ମାଛ ଓ ମାଂସ ଦୋକାନ ଆଦି ଖୋଲା ରହିବ । ପେଟ୍ରୋଲ ପମ୍ପ ଓ ଗ୍ୟାସ ବିତରଣ କେନ୍ଦ୍ର ମଧ୍ୟ ସ୍ବାଭାବିକ ରହିବ। ଏଥିସହ ଅନଲାଇନ ସେବା ଯୋଗାଉଥିବା କ୍ଷେତ୍ର ମଧ୍ୟ ଖୋଲା ରହିବା ନେଇ ଜିଲ୍ଲାପାଳ ସ୍ପଷ୍ଟ କରିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
