ରାଇରଙ୍ଗପୁର: ଅସାବଧାନତା ବଶତଃ କୂଅ ଭିତରେ ଖସି ପଡ଼ିଥିବା ଜଣେ ମହିଳାଙ୍କୁ ଉଦ୍ଧାର କଲା ଅଗ୍ନିଶମ ବାହିନୀ । ଏପରି ଏକ ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନଥାନା ନିକଟସ୍ଥ କଚେରୀ ପଡ଼ିଆରେ । ତେବେ ମହିଳା ଜଣଙ୍କ ସୁସ୍ଥ ଥିବା ଜଣାପଡିଛି ।
ଭିଡିଓ ସୌଜନ୍ୟ: ପ୍ରତିନିଧି, ରାଇରଙ୍ଗପୁର
ସୂଚନାନୁସାରେ ଅନୁପମା ସୋରେନ୍ ନାମକ ଜଣେ ମହିଳା ଘର ପାଖରେ ଥିବା ଏକ କୂଅ ଚାନ୍ଦିନୀରେ ବସିଥିଲେ । ତେବେ ଅସାବଧାନତା ବଶତଃ କୂଅ ଭିତରକୁ ସେ ଖସି ପଡ଼ିଥିଲେ । ପାଖରେ ଥିବା ଲୋକେ ଏହା ଦେଖି ତୁରନ୍ତ ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ତୁରନ୍ତ ଅଗ୍ନିଶମ ବିଭାଗ କର୍ମଚାରୀମାନେ ପହଞ୍ଚି ବହୁ କଷ୍ଟରେ ପାଣି ଭିତରୁ ଅନୁପମାଙ୍କୁ ଉଦ୍ଧାର କରିବା ସହିତ ଚିକିତ୍ସା ପାଇଁ ରାଇରଙ୍ଗପୁର ଡାକ୍ତରଖାନା ନେଇ ଭର୍ତ୍ତି କରିଥିଲେ । ତେବେ ତାଙ୍କ ସ୍ବାସ୍ଥ୍ୟବସ୍ଥା ଠିକ୍ ଥିବା ଜଣାପଡ଼ିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
