ରାଇରଙ୍ଗପୁର: ନିଆଁ ଲାଗି ଦୁଇ ବଖରା ଘର ପୋଡ଼ି ସମ୍ପୂର୍ଣ୍ଣ ଜଳି ପୋଡି ନଷ୍ଟ ହୋଇଯାଇଛି । ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବ୍ଲକ ଅନ୍ତର୍ଗତ ତାଳପଦା ଗ୍ରାମପଞ୍ଚାୟତ ଗହଣ୍ଡିଆ ଗ୍ରାମରେ । ଆଜି (ମଙ୍ଗଳବାର) ସକାଳ ସମୟରେ ନିଆଁ ଲାଗି ୨ ବଖରା ଘର ଜଳି ପୋଡି ନଷ୍ଟ ହୋଇଯାଇଛି ।
ସେପଟେ ଗ୍ରାମର ଶ୍ରୀରାମ ତଳସାରୁଡ଼ାଙ୍କ ନଡାକୁଟାରେ ତିଆରି ଚାଳ ଛାଉଣୀ ଘରେ କୌଣସି କାରଣରୁ ଘଟିଛି ଏହି ଅଗ୍ନିକାଣ୍ଡ । ଘରେ ନିଆଁ ଲାଗି ଯିବା ଜାଣି ପରିବାର ଲୋକେ ଓ ଗ୍ରାମବାସୀ ନିଆଁକୁ ଲିଭାଇବାକୁ ଚେଷ୍ଟା କରିଥିଲେ ମଧ୍ୟ ନିଆଁକୁ ଆୟତ୍ତ କରି ପାରିନଥିଲେ।
ପରେ ଠାକୁରମୁଣ୍ଡା ଅଗ୍ନିଶମ ବିଭାଗକୁ ଖବର ଦେବା ପରେ ବିଭାଗ କର୍ମଚାରୀ ମାନେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ତେବେ ନିଆଁରେ ପୋଡ଼ି ଯାଇ ଦୁଇଟି ସାଇକେଲ, ଘରର ସମସ୍ତ ଆସବାବପତ୍ର, ଝିଅ ବାହାଘର ପାଇଁ କିଣାଯାଇଥିବା ସୁନା ଗହଣା ସମେତ ନଗଦ ୧୦ ହଜାର ଟଙ୍କା ଏବଂ ଜମିବାଡ଼ି କାଗଜ ପତ୍ର ସବୁ ପୋଡ଼ି ଯାଇ ନଷ୍ଟ ହୋଇ ଯାଇଥିବାର ପରିବାର ଲୋକଙ୍କ ପକ୍ଷରୁ ସୂଚନା ମିଳିଛି । ନିଆଁ ଲାଗି ୨ ସାଇକେଲ, ଘରର ଆସବାବ ପତ୍ର, ସୁନା ଗହଣା ଜଳିଯାଇଥିବା ନେଇ ସୂଚନା ମିଳିଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
