ହାଇଦ୍ରାବାଦ: ଆପଲ୍ ପରେ ଏବେ ଗୁଗଲ୍ ଭାରତରେ ନିଜର ଫିଜିକାଲ୍ ଷ୍ଟୋର୍ ଖୋଲିବାକୁ ଯୋଜନା କରୁଛି । ଯଦି ଏପରି ହୁଏ ତେବେ ଏହା ଆମେରିକା ବାହାରେ କମ୍ପାନୀର ପ୍ରଥମ ରିଟେଲ୍ ଷ୍ଟୋର୍ ହେବ । ରଏଟର୍ସ ରିପୋର୍ଟ ଅନୁସାରେ ଏହି ଷ୍ଟୋର୍ ଲାଗି ଦିଲ୍ଲୀ ଓ ମୁମ୍ବାଇ ନିକଟବର୍ତ୍ତୀ ଅଞ୍ଚଳରେ ସ୍ଥାନ ଖୋଜା ଚାଲିଛି । ନିକଟରେ ଆପଲ୍ ଭାରତରେ 4ଟି ଆପଲ୍ ଷ୍ଟୋର୍ ଖୋଲିଥିବାବେଳେ ଏହି ରଣନୀତି କମ୍ପାନୀକୁ ସଫଳତା ପ୍ରଦାନ କରିଛି । ଏବେ ଗୁଗଲ୍ ବି ସମାନ ରାସ୍ତାରେ ଚାଲିବାକୁ ଯୋଜନା କରୁଛି ।
ଗୁଗଲ୍ରେ ଭାରତର ପ୍ରଥମ ଷ୍ଟୋର୍
ନୂଆଦିଲ୍ଲୀ ଏବଂ ମୁମ୍ବାଇରେ ଏହାର ରିଟେଲ୍ ଷ୍ଟୋର୍ଗୁଡିକ ପାଇଁ ସ୍ଥାନ ଚୂଡ଼ାନ୍ତ କରିବାରେ ଗୁଗଲ୍ ଅନ୍ତିମ ପର୍ଯ୍ୟାୟରେ ଅଛି । ଟେକ୍ ଜଏଣ୍ଟ୍ ଗୁରୁଗ୍ରାମକୁ ଅନ୍ୟ ଏକ ସମ୍ଭାବ୍ୟ ସ୍ଥାନ ଭାବରେ ବିଚାର କରୁଥିବାବେଳେ ବେଙ୍ଗାଲୁରୁକୁ ଏହି ପ୍ରକ୍ରିୟାରେ ପୂର୍ବରୁ ରହିଛି । ଷ୍ଟୋର୍ଗୁଡିକ ପ୍ରାୟ 15,000 ବର୍ଗଫୁଟ ଅଞ୍ଚଳରେ ନିର୍ମାଣ ହୋଇପାରେ ଏବଂ ଆସନ୍ତା 6ମାସ ମଧ୍ୟରେ ଖୋଲିପାରେ ବୋଲି ଆଶା କରାଯାଉଛି । ଏହି ଆଉଟଲେଟ୍ ଗୁଡିକ ପିକ୍ସେଲ ସ୍ମାର୍ଟଫୋନ୍, ସ୍ମାର୍ଟୱାଚ୍ ଏବଂ ଇଅରବଡ୍ ସହିତ ଗୁଗଲ୍ର ହାର୍ଡୱେର୍ ଇକୋସିଷ୍ଟମ୍ ଉପଲବ୍ଧ କରାଇବ ।
ଏବେ ଗୁଗଲ୍ ପାଖରେ କେତେ ଷ୍ଟୋର୍ ?
ଗୁଗଲ୍ ନିକଟରେ ଏବେ ମୋଟ 5ଟି ଫିଜିକାଲ୍ ଷ୍ଟୋର୍ ଥିବାବେଳେ ସମସ୍ତ ଷ୍ଟୋର୍ଗୁଡ଼ିକ ଆମେରିକାରେ ଅଛି । ଏଠାରେ କମ୍ପାନୀ ନିଜର ପିକ୍ସେଲ ଫୋନ୍, ୱାଚ୍, ଇଅରବଡ୍ସ ବିକ୍ରି କରୁଛି । ଏବେ ଭାରତରେ ନିଜର ପ୍ରଡକ୍ଟ ବିକ୍ରି କରିବା ଲାଗି ଗୁଗଲ୍ ପ୍ରାଧିକୃତ ରିଟେଲର୍ଙ୍କ ଉପରେ ନିର୍ଭର କରୁଛି । ଅନ୍ୟପଟେ ଆପଲ୍ ସାରା ବିଶ୍ବରେ 500ରୁ ଅଧିକ ଷ୍ଟୋର୍ ଖୋଲିଛି । ଗୁଗଲ୍ ନିଜର ମୁଖ୍ୟ ପ୍ରତିଦ୍ବନ୍ଦ୍ବୀ ଆପଲ୍କୁ ଟକ୍କର ଦେବା ଲାଗି ଏହା ଉପରେ ଧ୍ୟାନ ଦେଉଛି । ଯଦି ସଫଳତା ମିଳେ, ତେବେ ଆଉ ଷ୍ଟୋର୍ ଖୋଲିବ ଗୁଗଲ୍ ।
ଭାରତରେ ଗୁଗଲ୍ ଲାଗି ସୁଯୋଗ
ଏହି ରିଟେଲ୍ ଷ୍ଟୋରଗୁଡ଼ିକର ଆଧିକାରିକ ଲଞ୍ଚ ସମ୍ପର୍କରେ କମ୍ପାନୀ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇନାହିଁ, କିନ୍ତୁ ଗୁଗଲ୍ର ପ୍ରଥମ ରିଟେଲ୍ ଷ୍ଟୋର୍ ଭାରତୀୟ ବଜାରରେ ଏହାର ଉପସ୍ଥିତିକୁ ପୂର୍ବାପେକ୍ଷା ଅଧିକ ସୁଦୃଢ କରିବ । ଯେହେତୁ କମ୍ପାନୀ ସିଧାସଳଖ ଆପଲ୍ ସହିତ ମୁକାବିଲା କରିବାକୁ ପ୍ରସ୍ତୁତ ଅଛି, ଏଥିଲାଗି ଭାରତୀୟ ଉପଭୋକ୍ତା ଖୁବଶୀଘ୍ର ଗୁଗଲ୍ଠାରୁ ପ୍ରିମିୟମ, ହ୍ୟାଣ୍ଡ୍ସ-ଅନ୍ ରିଟେଲ୍ ଅନୁଭବର ଆଶା ରଖିଛନ୍ତି ।
କହି ରଖୁଛୁ କି, ଗୁଗଲ୍ ପୂର୍ବରୁ ହିଁ ଭାରତରେ ଏହାର ପିକ୍ସେଲ ସ୍ମାର୍ଟଫୋନର ଉତ୍ପାଦନ କରି ସ୍ଥାନୀୟ ଉତ୍ପାଦନ ବୃଦ୍ଧି ପାଇଁ ପ୍ରୟାସ କରିଛି ଯାହାକି ଭାରତ ସରକାରଙ୍କ 'ମେକ୍ ଇନ୍ ଇଣ୍ଡିଆ' ପଦକ୍ଷେପକୁ ସମର୍ଥନ କରୁଛି ।
