ବାରିପଦା: 2010 ମସିହା ଅପ୍ରେଲ ମାସ 6 ତାରିଖରେ ଛତିଶଗଡ଼ ଦାନ୍ତେୱାଡାରେ ମାଓବାଦୀଙ୍କ ଆକ୍ରମଣରେ ଶହୀଦ ହୋଇଥିଲେ ସିଆରପିଏଫ- 62 ବାଟାଲିୟନର 76 ଯବାନ ଜଗେଶ୍ଵର ନାୟକ । ନକ୍ସଲଙ୍କ ଦ୍ବାରା ହୋଇଥିବା ବିସ୍ଫୋରଣରେ ଓଡିଶାରୁ ଜଗେଶ୍ଵରଙ୍କୁ ମିଶାଇ ଦୁଇ ଜଣ ଯବାନ ଶହୀଦ ହୋଇଥିଲେ ।
ମୟୂରଭଞ୍ଜ ଜିଲ୍ଲା ବାଙ୍ଗରିପୋଷି ଥାନା ପାଣିଷୋଳ ଗ୍ରାମର ଜଗେଶ୍ଵର 2004 ମସିହାରେ ସିଆରପିଏଫ ର 62 ବାଟାଲିୟନରେ ଯୋଗ ଦେଇଥିଲେ । ଆହ୍ଲାବାଦରେ ଟ୍ରେନିଂ ସରିବା ପରେ ପ୍ରଥମେ କାଶ୍ମୀର ଓ ପରେ ଛତିଶଗଡ ଦାନ୍ତେୱାଡାରେ କାର୍ଯ୍ୟରତ ଥିଲେ ।
ଦେଶ ପାଇଁ ଶହୀଦ ହୋଇଥିବା ଜଗେଶ୍ଵରଙ୍କୁ ଆଜି ବି ଝୁରୁଛି ପରିବାର। ପୁଅର ମୃତ୍ୟୁ ପରେ ମନ ଯେତିକି ଦୁଃଖ ଥିଲା ଦେଶ ପାଇଁ ଶହୀଦ ହୋଇଥିବାରୁ ପରିବାର ସେତିକି ଗର୍ବ ଅନୁଭବ କରୁଥିବା କୁହନ୍ତି ବାପା । ଏବେବି ମନର କୋହକୁ ବୁଝାଇ ପାରୁନାହାନ୍ତି ଜଗେଶ୍ଵର ଙ୍କ ପରିବାର । ବାପା, ମା, ସ୍ତ୍ରୀ, ସାନଭାଇ ଓ ଗୋଟିଏ ଝିଅକୁ ନେଇ ଶହୀଦ ଜଗେଶ୍ଵର ଙ୍କ ପରିବାର ।
ସେହି ସମୟରେ ସମବେଦନା ଜଣାଇବା ପାଇଁ ଶହୀଦଙ୍କ ବାସଭବନରେ ନେତା, ମନ୍ତ୍ରୀ ଓ ବହୁ ମାନ୍ୟଗଣ୍ୟ ବ୍ୟକ୍ତିଙ୍କ ଭିଡ ଦେଖିବାକୁ ମିଳିଥିଲା । ସରକାରଙ୍କ ପକ୍ଷରୁ ବହୁତ ଯୋଜନା ପାଇଁ ମଧ୍ୟ ପ୍ରତିଶୃତି ଦିଆଯାଇଥିଲା । ପରିବାରରୁ ଜଣକୁ ସରକାରୀ ଚାକିରି ସହ ଶହୀଦଙ୍କ ନାମରେ ଏକ କ୍ଲବଘର ବା ରାସ୍ତା ନିର୍ମାଣ ପାଇଁ ଦିଆଯାଇଥିବା ପ୍ରତିଶୃତି ଏବେ ପାଣିଗାର । ସେତେବେଳେ ବାଙ୍ଗରିପୋଷୀ ବିଧାୟିକା ଥିବା ସରୋଜିନି ହେମ୍ବ୍ରମ ଏକ ପ୍ରତିମୂର୍ତ୍ତୀ ସ୍ଥାପନ କରିଥିଲେ, ଯାହା ଶହୀଦ ଜଗେଶ୍ଵରଙ୍କ ମୁହଁ ସହ ମିଶୁନାହିଁ ବୋଲି ଅଭିଯୋଗ ଆଣିଛନ୍ତି ତାଙ୍କ ସାନଭାଇ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି ଇଟିଭି ଭାରତ
