ବାରିପଦା: ମୟୂରଭଞ୍ଜ ଶିମିଳିପାଳ ଅଭୟାରଣ୍ୟରେ ନିଆଁ ଲାଗିବାର ସୁଯୋଗ ନେଇ ଶିକାରୀମାନେ ଜନ୍ତୁ ଶିକାରରେ ମାତିଛନ୍ତି। ପୋଡାଡ଼ିହା ରେଞ୍ଜରୁ ଜଣେ ଶିକାରୀକୁ ଗିରଫ କରିବା ସହ ୭ କିଲୋ ଝିଙ୍କ ମାଂସ ଜବତ କରିଛି ବନ ବିଭାଗ।
ଶିମିଳିପାଳ ଅଭୟାରଣ୍ୟରେ ଶିକାର ପାଇଁ ଜଙ୍ଗଲରେ ନିଆଁ ଲଗାଉଥିବାବେଳେ ଜଣେ ଶିକାରୀକୁ ଗିରଫ କରିଛି ବନବିଭାଗ । ବୁଧବାର ବନ ବିଭାଗ ପାଟ୍ରୋଲିଂ କରୁଥିବାବେଳେ ଏହି ଶିକାରୀକୁ ଧରିବାରେ ସକ୍ଷମ ହୋଇଛନ୍ତି। ଶିକାରୀ ଜଣକ ପୋଡାଡିହା ରେଞ୍ଜରେ ନିଆଁ ଲଗାଉଥିବା ବେଳେ ଶିମିଳିପାଳ କୋର ଅଞ୍ଚଳରୁ ତାକୁ ଗିରଫ କରିଛି ପୋଡାଡିହା ବନବିଭାଗ । ଗିରଫ ଶିକାରୀ ଜଣକ ହେଲେ ଅନ୍ତରା ସିଂ ।
ଶିକାରୀଙ୍କ ନିକଟରୁ ଗୋଟିଏ ଦେଶୀ ବନ୍ଧୁକ ସହିତ ୭ କିଲୋ ଝିଙ୍କ ମାଂସ ଜବତ କରିଛି ବନବିଭାଗ । ଏହାସହ ଏକ କୁରାଢୀକୁ ମଧ୍ୟ ବନବିଭାଗ ଜବତ କରିଛି । ଶିକାରୀ ଜଣକର ଘର କପ୍ତିପଦା ବ୍ଲକ ପଣ୍ଡେସାହି ଗ୍ରାମର ହୋଇଥିବା ଜଣାଯାଇଛି । ତେବେ ଶିମିଳିପାଳରେ ପାଟ୍ରୋଲିଂକୁ ଅଧିକ ଗୁରୁତ୍ବ ଦେବା ସହ ସମ୍ପୃକ୍ତ ଶିକାରୀମାନଙ୍କ ଉପରେ ନଜର ଦିଆଯିବ ବୋଲି ରେଞ୍ଜ ଅଧିକାରୀ କହିଛନ୍ତି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
