ବାରିପଦା: କେନାଲରେ ପଡି ହୋମଗାର୍ଡଙ୍କ ମୃତ୍ୟୁ ଅଭିଯୋଗ । ମୟୂରଭଞ୍ଜ ଲକ୍ଷ୍ମୀପୋଷି ଫାଣ୍ଡିରୁ ରାତି 10ଟାବେଳେ ଘରକୁ ଫେରୁଥିବା ସମୟରେ ଏହି ଅଘଟଣ ଘଟିଛି । ମୃତ ହୋମଗାର୍ଡ ଜଣକ ହେଲେ ଜାମିନି ଚନ୍ଦ୍ର ମହାନ୍ତ । ସେ ନିଜ ଡ୍ୟୁଟି ସାରି ଘରକୁ ଫେରୁଥିବା ସମୟରେ ଏହି ଘଟଣା ଘଟିଛି ।
ଜାମିନୀ ନିଜ ଡ୍ୟୁଟି ସାରି ତାଙ୍କ ମଟର ସାଇକେଲରେ ତାଙ୍କ ଘର ଚାନ୍ଦୁଆ ବ୍ଲକସ୍ଥିତ କରକଚିଆ ଗ୍ରାମକୁ ଫେରୁଥିବା ସମୟରେ କୌଣସି କାରଣବଶତଃ ଝିନେଇ ଗ୍ରାମ ନିକଟରେ ଥିବା କେନାଲ ଭିତରକୁ ଖସି ପଡିଥିଲେ । ତେବେ ରାତି ବେଶୀ ହୋଇଥିବାରୁ ସେଇ ରାସ୍ତାରେ ଲୋକଙ୍କ ଯାତାୟାତ ନ ଥିବାରୁ କାହା ନଜରକୁ ଆସିପାରିନଥିଲା ।
ସକାଳୁ ସ୍ଥାନୀୟ ଲୋକମାନେ ଶୌଚ ପାଇଁ ଯାଇଥିବାବେଳେ କେନାଲ ଭିତରେ କେହି ପଡିଥିବାର ଦେଖି ପାଖକୁ ଯାଇ ଜାମିନୀକୁ ଚିହ୍ନି ପାରିଥିଲେ। ସଙ୍ଗେ ସଙ୍ଗେ ତାଙ୍କୁ କେନାଲରୁ ଉଦ୍ଧାର କରି ବାରିପଦା ପଣ୍ଡିତ ରଘୁନାଥ ମୁର୍ମୂ ମେଡିକାଲକୁ ଆଣିଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।
ତେବେ ତାଙ୍କ ଉପରେ ନିର୍ଭର କରୁଥିବା ତାଙ୍କ ପରିବାର ଏବେ ଅସହାୟ ହୋଇପଡିଥିବାରୁ ପରିବାରରୁ ଜଣକୁ ନିଯୁକ୍ତି ସହ ତୁରନ୍ତ ଉଚିତ କ୍ଷତିପୂରଣ ପ୍ରଦାନ ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
