ବାରିପଦା: ସମସ୍ତଙ୍କୁ ଘାରିଛି କୋରୋନା ଭୟ । ଯାହାକୁ ନେଇ କେନ୍ଦ୍ର ସରକାରଙ୍କ ଠାରୁ ଆରମ୍ଭ କରି ରାଜ୍ୟ ସରକାରଙ୍କ ପର୍ଯ୍ୟନ୍ତ ସମସ୍ତେ ସଜାଗ । ତେବେ ଏହାକୁ ନେଇ ସାଧାରଣ ଜନତା ପୁରା ସଜାଗ ରହିଥିବା ବେଳେ ନିଆରା ଢଙ୍ଗରେ ସଚେତନତା କାର୍ଯ୍ୟକ୍ରମକୁ ଆଗେଇ ନେଇଛନ୍ତି ମୟୂରଭଞ୍ଜ ଜିଲ୍ଲା ଉଦଳା ଉପଖଣ୍ଡ ଡିହିରାକୁଳ ଗ୍ରାମବାସୀ ।
କୋରୋନା ଭାଇରସକୁ ନେଇ ଏବେ ସବୁଠି ଚର୍ଚ୍ଚା । ଏନେଇ ଏକ ନିଆରା ଢଙ୍ଗରେ ସଚେତନତା ବାର୍ତ୍ତା ଦେଇଛନ୍ତି ମୟୂରଭଞ୍ଜ ଜିଲ୍ଲା ଉଦଳା ଉପଖଣ୍ଡ ଡିହିରାକୁଳ ଗ୍ରାମବାସୀ । ଡିହିରାକୁଳ ଗ୍ରାମରେ ଥିବା ରାଧାଗୋବିନ୍ଦ ସଂକୀର୍ତ୍ତନ ପାଲା ମଣ୍ଡଳୀ ପକ୍ଷରୁ ନିଆରା ଢଙ୍ଗରେ କରାଯାଇଛି ସଚେତନତା । ଶନିବାର ସକାଳ ସମୟରେ ପାଲା ମଣ୍ଡଳୀ ପକ୍ଷରୁ ପାଲା ବା ସଂକୀର୍ତ୍ତନ ଜରିଆରେ କୋରୋନା ସଚେତନତା ନେଇ ବାର୍ତ୍ତା ଦେଇଥିଲେ ।
ଏଥିସହ କୋରୋନାକୁ ଭୟ ନ କରି କୋରୋନାକୁ ପ୍ରତିରୋଧ କରିବା ପାଇଁ କ’ଣ କ’ଣ ସଚେତନତା ଅବଲମ୍ବନ କରାଯିବ ସେନେଇ ସଂକୀର୍ତ୍ତନ ଜରିଆରେ ଗୀତ ଗାଇ ଗ୍ରାମବାସୀଙ୍କୁ ସଚେତନ କରାଇଛନ୍ତି ପାଲା ମଣ୍ଡଳୀର ସଦସ୍ୟ । ଗ୍ରାମରେ ଲୋକମାନେ ଏହାକୁ ସୁନ୍ଦର ଭାବେ ଗ୍ରହଣ କରିଥିବା ବେଳେ କୋରୋନାରୁ ବଞ୍ଚିବା ପାଇଁ ହାତ, ମୁହଁ ଧୋଇବା ସହିତ କିଭଳି ମାର୍ଚ୍ଚ 22, ରବିବାର ହେବାକୁ ଥିବା ଜନତା କର୍ଫ୍ୟୁକୁ ପାଳନ କରିବେ ସେନେଇ ସଚେତନ କରାଇଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
