ରାଇରଙ୍ଗପୁର: ଉପନିର୍ବାଚନରେ ବିଜେଡି ସମର୍ଥିତ ପ୍ରାର୍ଥୀଙ୍କ ବିଜୟ ଲାଭ ପରେ ବିଜେଡିର ପ୍ରେସମିଟ୍। ଗତ ବୁଧବାର ମୟୂରଭଞ୍ଜ ଜିଲ୍ଲା ଯାମଦା ପଞ୍ଚାୟତ ସମିତି ଉପାଧ୍ୟକ୍ଷ ଉପନିର୍ବାଚନରେ ବିଜେଡି ହାତେଇଛି ଉପାଧ୍ୟକ୍ଷ ଆସନ। ସାଗ୍ରାମ ମୁର୍ମୁ ଯାମଦା ପଞ୍ଚାୟତ ସମିତି ଉପାଧ୍ୟକ୍ଷ ହୋଇଛନ୍ତି।
ତେବେ ଗତ ସାଧାରଣ ନିର୍ବାଚନରେ ରାଇରଙ୍ଗପୁର ନିର୍ବାଚନ ମଣ୍ଡଳୀରେ ବିଜେଡି ବିଧାୟକ ପ୍ରାର୍ଥୀ ପରାଜୟ ବରଣ କରିଥିଲେ। ମାତ୍ର ଏହି ଉପନିର୍ବାଚନରେ ବିଜେଡି ସମର୍ଥିତ ପ୍ରାର୍ଥୀ ବିଜୟ ଲାଭ କରିବାରୁ ବିଜେଡିର ତୁଙ୍ଗ ନେତା ଓ କର୍ମୀଙ୍କ ମଧ୍ୟରେ ଆନନ୍ଦ ଉତ୍ସାହ ପରିଲକ୍ଷିତ ହୋଇଥିଲା।
ଯାହାକୁ ନେଇ ଆଜି(ଗୁରୁବାର) ରାଇରଙ୍ଗପୁର ସହରର ମହୁଲଡିହା ଡାକବଙ୍ଗଳାଠାରେ ବିଜେଡି ତରଫରୁ ଏକ ସମ୍ବର୍ଦ୍ଧନା ସଭାର ଆୟୋଜନ ସହିତ ପ୍ରେସମିଟ୍ କରାଯାଇଥିଲା।
ଉକ୍ତ ସଭାରେ ବିଜେଡିର ଜିଲ୍ଲା ସଭାପତି ଦେବାଶିଷ ମହାନ୍ତି, ବରିଷ୍ଠ ନେତା ରତିକାନ୍ତ ପରୀକ୍ଷା, ରାଇରଙ୍ଗପୁର ପୂର୍ବତନ ବିଧାୟକ ସାଇବା ସୁଶିଲ ହାଁସଦା ପ୍ରମୁଖ ନେତା ନବ ନିର୍ବାଚିତ ଯାମଦା ବ୍ଲକ ଉପାଧ୍ୟକ୍ଷ ସାଗ୍ରାମ ମୁର୍ମୁଙ୍କୁ ବିପୁଳ ସ୍ବାଗତ ସମ୍ବର୍ଦ୍ଧନା ଜ୍ଞାପନ କରିଥିଲେ। ଏହାସହ ଏହି ବିଜୟର ଶ୍ରେୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଦେଇଥିଲେ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
