ମାଲକାନଗିରି: କାଲିମେଳା ବ୍ଲକ ଅନ୍ତର୍ଗତ ବେଜାଙ୍ଗିବାଡ଼ା ପଞ୍ଚାୟତର ବେହେରାଗୁଡା ନିକଟରେ ଥିବା ଜଳ ପ୍ରପାତରେ ଅଘଟଣ । ଏଠାରେ ଜଣେ ଯୁବକ ଗାଧୋଇବାକୁ ଯାଇ ପ୍ରାଣ ହରାଇଥିବା ଜଣାପଡିଛି । ଯୁବକ ଜଣକ ଗମ୍ପାକୋଣ୍ଡା ପଞ୍ଚାୟତ ଅନ୍ତର୍ଗତ ଏମ୍.ପି.ଭି ୨୬ ଗ୍ରାମର ବିଜୁ ମଣ୍ଡଳ ।
ଜଳପ୍ରପାତରେ ଗାଧୋଇବା ବେଳେ ପିଟି ହେଲା ମୁଣ୍ଡ, ଯୁବକ ମୃତ
ସୂଚନା ଅନୁସାରେ ବିଜୁ ତାଙ୍କ ବନ୍ଧୁମାନଙ୍କ ସହ ବେହେରାଗୁଡା ୱାଟର ଫଲରେ ବୁଲିବାକୁ ଯାଇଥିଲେ । ସେଠାରେ ଜଳପ୍ରପାତ ମଧ୍ୟରେ ଗାଧୋଇବା ସହ ଖେଳୁଥିବା ବେଳେ ହଠାତ ପାଣିରେ ଖସି ଯାଇ ପଥରରେ ତାଙ୍କ ମୁଣ୍ଡ ବାଡେଇ ହୋଇ ଯାଇଥିଲା । ଏହା ଦେଖି ତୁରନ୍ତ ବନ୍ଧୁମାନେ ବିଜୁକୁ ଉଦ୍ଧାର କରି ପ୍ରଥମେ ଏମ୍.ଭି ୨୧ ସ୍ୱାସ୍ଥ୍ୟ କେନ୍ଦ୍ରକୁ ଆଣିଥିଲେ ।
ପ୍ରାଥମିକ ଚିକିତ୍ସା ପରେ ସେ ଗୁରୁତର ଥିବାରୁ ମାଲକାନଗିରି ମୁଖ୍ୟ ଚିକିତ୍ସାଳୟକୁ ପଠାଇଥିଲେ । ହେଲେ ସେଠାରୁ ପୁଣି କୋରାପୁଟ ନେବା ବାଟରେ ମାଥିଲିରେ ସେ ପ୍ରାଣ ହରାଇଥିଲେ । ଏହି ଖବର ପ୍ରଚାରିତ ହେବା ପରେ ଗାଁରେ ଶୋକର ଲହରୀ ଖେଳିଯାଇଛି ।
ମାଲକାନିଗିରିରୁ ଦେବଦତ୍ତ ବେହେରା, ଇଟିଭି ଭାରତ
