ମାଲକାନଗିରି : ସୀମାନ୍ତରେ ପୁଣି ଦେଖିବାକୁ ମିଳିଛି ମାଓହିଂସା । ପୋଲିସ ଇନଫର୍ମର ସନ୍ଦେହରେ ଜଣେ ଆତ୍ମସମର୍ପଣ କରିଥିବା ନକ୍ସଲକୁ ଗୁଳି କରି ହତ୍ୟା କରିଛି ରକ୍ତମୁଖା ଲାଲବାହିନୀ ।
ମାଲକାନଗିରି ଜିଲ୍ଲାର ବିଛିନ୍ନାଞ୍ଚଳ ନିକଟ ଆନ୍ଧ୍ରପ୍ରଦେଶ ବିଶାଖା ଜିଲ୍ଲାର ଗୁଡେମ ଥାନା ଅନ୍ତର୍ଗତ କୁମକୁମପୋଡି ଗ୍ରାମର ଲମ୍ବାୟା ପିଲାଲୁଙ୍କୁ ନକ୍ସଲମାନେ ଗୁଳି କରି ହତ୍ୟା କରିଛନ୍ତି । ଗତକାଲି ବିଳମ୍ବିତ ରାତିରେ ୧୦ ରୁ ୧୫ ଜଣ ସଶସ୍ତ୍ର ନକ୍ସଲ କୁମକୁମପୋଡି ଗାଁରେ ପହଞ୍ଚି ଲମ୍ବାୟା ପିଲାଲୁଙ୍କୁ ଘରୁ ଡାକି ନେଇଥିଲେ । ହେଲେ ଗାଁ ମୁଣ୍ଡ ରାସ୍ତାରେ ନକ୍ସଲମାନେ ଲମ୍ବାୟା ପିଲାଲୁଙ୍କୁ ଛାତିରେ ଗୁଳି ମାରିଥିବାବେଳେ ମୁଣ୍ଡ ପଛପଟେ ପଥରରେ ଛେଚି ଦେଇଛନ୍ତି । ଘଟଣାସ୍ଥଳରେ ଲମ୍ବାୟା ପିଲାଲୁ ପ୍ରାଣ ହରାଇଛନ୍ତି ।
ନକ୍ସଲମାନେ ସେଠାରେ ଏକ ହାତ ଲେଖା ଚିଠି ଛାଡି ଯାଇଛନ୍ତି । ଯେଉଁଥିରେ ଉଲ୍ଲେଖ ରହିଛି ଯେ ଆନ୍ଧ୍ର ଓଡିଶା ବୋର୍ଡର ବିଶାଖା ଡିଭିଜନରେ ପୂର୍ବରୁ ଲମ୍ବାୟା ପିଲାଲୁ ମାଓବାଦୀ ଭାବେ କାର୍ଯ୍ୟ କରୁଥିଲେ । ପୋଲିସ ପାଖରେ ଆତ୍ମ ସମର୍ପଣ କରି ମାଓ ସଂଗଠନର ଇନଫରମେସନ ପୋଲିସକୁ ଦେଉଥିଲା । ତେଣୁ ମୃତ୍ୟୁ ଦଣ୍ଡ ଦିଆଯାଇଛି ବୋଲି ନକ୍ସଲ ଚିଠିରେ ଲେଖା ରହିଛି । ଅନ୍ୟପଟେ ଏହି ମାଓ ହିଂସା ଘଟିବା ପରେ ସୀମାନ୍ତରେ ଆନ୍ଧ୍ର ଓଡିଶା ପୋଲିସ ପକ୍ଷରୁ କୁମ୍ବିଂ ଅପରେସନକୁ ଜୋରଦାର କରାଯାଇଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
