ମାଲକାନଗିରି: ଭଲ କାମ ପାଇଁ ପୁରସ୍କୃତ ହେଲେ ମାଲକାନଗିରି ମହାବିଦ୍ୟାଳୟ ବାଣିଜ୍ୟ ବିଭାଗର ଅଧ୍ୟାପକ ଡକ୍ତର. ରଞ୍ଜନ କୁମାର ସ୍ୱାଇଁ । ଶନିବାର ଭୁବନେଶ୍ୱର ରାଜଭବନର ଅଭିଶେକ ହଲରେ ଭାରତୀୟ ରେଡ଼କ୍ରସ ସୋସାଇଟି ଶାଖାର ପୁରସ୍କାର ବିତରଣ ଉତ୍ସବରେ ରାଜ୍ୟପାଳ ମୁଖ୍ୟ ଅତିଥି ଭାବରେ ଯୋଗ ଦେଇ ରଞ୍ଜନ କୁମାର ସ୍ୱାଇଁଙ୍କୁ ମାନପତ୍ର ଓ ଟ୍ରଫି ଦେଇ ପୁରସ୍କୃତ କରିଛନ୍ତି ।
ବିଶେଷ କରି ଉପାନ୍ତ ଜିଲ୍ଲା ମାଲକାନଗିରିରେ ଡକ୍ଟର ସ୍ୱାଇଁ ଜଣେ ଅଧ୍ୟାପକ ଭାବେ ଯେତିକି ପରିଚିତ ତାହା ଠାରୁ ଜଣେ ସମାଜ ସେବୀ ଭାବେ ଅଧିକ ଜଣାଶୁଣା । ଜିଲ୍ଲା ରକ୍ତ ଭଣ୍ଡାରରେ ବୁନ୍ଦାଏ ରକ୍ତ ପାଇଁ ରୋଗୀ ହଇରାଣ ହେଉଥିବା ବେଳେ ଡକ୍ଟର ସ୍ୱାଇଁ ଏହା ପ୍ରତି ସ୍ୱର ଉଠାଇଥିଲେ ।
ଏହାସହ ବାଲ୍ୟ ବିବାହ, ଶିଶୁ ଶ୍ରମିକ ଏବଂ ପ୍ରାକୃତିକ ଦୁର୍ବିପାକ ସମୟରେ ଆଗକୁ ଆସି ଛାତ୍ରଛାତ୍ରୀଙ୍କୁ ଧରି ଅନେକ ଉଲ୍ଲେଖନୀୟ କାର୍ଯ୍ୟ କରିଛନ୍ତି । ଏହାଛଡା ଏଡ଼ସ ଭଳି ମାରାତ୍ମକ ରୋଗ ପାଇଁ ସଚେତନତା କରିବା ଏବଂ ଆଦିବାସୀ ପିଲାଙ୍କ ଭବିଷ୍ୟତ ପାଇଁ ଶିକ୍ଷାର ପ୍ରଚାର କରିବା ଭଳି ଅନେକ କାର୍ଯ୍ୟ ଉପାନ୍ତ ଜିଲ୍ଲାରେ ସେ କରିଛନ୍ତି ।
ଏହି ପୁରସ୍କାର ବିତରଣ ଉତ୍ସବରେ ଉଚ୍ଚ ଶିକ୍ଷା ମନ୍ତ୍ରୀ ଅରୁଣ କୁମାର ସାହୁ, ସ୍ୱାସ୍ଥ୍ୟମନ୍ତ୍ରୀ ନବ ଦାସ, ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ସହ ଅନେକ ପ୍ରଶାସନିକ ଅଧିକାରୀ ଉପସ୍ଥିତ ଥିଲେ ।
ମାଲକାନଗିରିରୁ ଜୟନ୍ତ ତିଆଡ଼ି, ଇଟିଭି ଭାରତ
