ମାଲକାନଗିରି: ନୂତନ ପଞ୍ଚାୟତ ଘୋଷଣା ଓ ରାସ୍ତା ନିର୍ମାଣ ପାଇଁ ଜିଲ୍ଲାପାଳଙ୍କୁ ଭେଟିଲେ ବିଛିନ୍ନାଞ୍ଚଳ ନାକାମାମୁଡି ପଞ୍ଚାୟତବାସୀ। ମାଲକାନଗିରି ଜିଲ୍ଲାର ନାକାମାମୁଡି ପଞ୍ଚାୟତ ପୁର୍ବରୁ କୁଡୁମୁଲୁଗୁମ୍ମା ବ୍ଲକ ଅଧିନରେ ଥିଲା । କୁଡୁମୁଲୁଗୁମ୍ମା ବ୍ଲକକୁ ଚିତ୍ରକୁଣ୍ଡାକୁ ସ୍ଥାନାନ୍ତର କରିଲାପରେ ବର୍ତ୍ତମାନ କୋରୋକୁଣ୍ଡା ବ୍ଲକ ଅଧୀନରେ ଏହି ପଞ୍ଚାୟତ ରହିଛି । ତେବେ ଏବେ ଦୂରତା କାରଣରୁ ବିଭିନ୍ନ ସମସ୍ୟା ହେଉଥିବାବେଳେ ସ୍ଥାନୀୟ ଗ୍ରାମବାସୀଙ୍କ ଦାବି ପ୍ରତି ପ୍ରଶାସନ କର୍ଣ୍ଣପାତ ନକେଲେ ପଞ୍ଚାୟତ ନିର୍ବାଚନକୁ ବର୍ଜନ କରିବାକୁ ଚେତାବନୀ ଦେଇଛନ୍ତି ପଞ୍ଚାୟତବାସୀ ।
ଏହି ପଞ୍ଚାୟତରେ 19ଟି ଓ୍ବାର୍ଡରେ 33ଟି ଗାଁର 7 ହଜାରରୁ ଅଧିକ ଭୋଟର ଥିବାବେଳେ 7ଟି ୱାର୍ଡର 15ଟି ଗାଁର 6 ହଜାରରୁ ଅଧିକ ଗ୍ରାମବାସୀ ଚିତ୍ରକୋଣ୍ଡା ଜଳଭଣ୍ଡାର ମଧ୍ୟରେ ରୁହନ୍ତି ଏବଂ ଆଉ କିଛି ଗ୍ରାମ ପାହାଡ ପର୍ବତ ମଧ୍ୟରେ ରହୁଛି । ଗାଁ ଗୁଡିକ ପଞ୍ଚାୟତ ଠାରୁ 40-50 କିଲୋମିଟର ଦୂର ହେଉଥିବାରୁ ଚାଲିଚାଲି ଆସି ଭତ୍ତା ଟଙ୍କା ଓ ପିଡିଏସ୍ ଚାଉଳ ନେବାକୁ ଦୁଇ ଦିନ ଲାଗିଯାଉଛି । ଯାହା ଫଳରେ ପଞ୍ଚାୟତବାସୀ ନିଜ ପଞ୍ଚାୟତକୁ ଆସି ସରକାରୀ ସୁବିଧା ସୁଯୋଗ ପାଇବାରେ ନାହିଁନଥିବା ସମସ୍ୟା ଭୋଗୁଛନ୍ତି । ଏଣୁ ଏହି ପଞ୍ଚାୟତର ବାୟାପଡ, ଆମ୍ବିଳିବେଡା, ନାରିଙ୍ଗିଝୋଲା, ମୁଦୁଲିଗୁଡା ଭଳି ବହୁ ଗାଁରୁ ଆଦିବାସୀ ଡିଡାଇ ଜନଜାତିର ଗ୍ରାମବାସୀ ଆସି ଜିଲ୍ଲାପାଳଙ୍କୁ ଭେଟି ନାକାମାମୁଡି ପଞ୍ଚାୟତକୁ ଭାଗକରି ବାୟାପଡା ଓ ମୁଦୁଲିଗୁଡାରେ ୨ଟି ନୂତନ ପଞ୍ଚାୟତ ଘୋଷଣା କରିବାକୁ ଦାବି କରିବା ସହ ସେ ସ୍ଥାନୀୟ ଅଞ୍ଚଳରେ ଯାତାୟତ ପାଇଁ ଭଲ ରାସ୍ତା ନିର୍ମାଣ କରିବାକୁ କହିଛନ୍ତି ।
ଏହାର ତୁରନ୍ତ ସମାଧାନ କରାନଗଲେ ଆଗାମୀ ତ୍ରିସ୍ତରୀୟ ପଞ୍ଚାୟତ ନିର୍ବାଚନକୁ ବର୍ଜନ କରିବାକୁ ଜିଲ୍ଲାପାଳଙ୍କୁ ଜଣାଇ ଦେଇଛନ୍ତି ଗ୍ରାମବାସୀ । ଏହି ବିଷୟରେ ଜିଲ୍ଲାପାଳଙ୍କୁ ପଚାରିବାରୁ କ୍ୟାମେରା ସାମ୍ନାରେ କିଛି ନକହିଥିଲେ ମଧ୍ୟ ଆଗାମୀ ଜନଗଣନା ଅନୁସାରେ ଯେଉଁ ଅଞ୍ଚଳରେ ଲୋକସଂଖ୍ୟା ଅଧିକ ହେବ, ସେ ଅଞ୍ଚଳରେ ନୂତନ ପଞ୍ଚାୟତ ଗଠନ କରାଯିବ ବୋଲି ସୂଚନା ଦେଇଛନ୍ତି । ସେହିପରି ପଞ୍ଚାୟତବାସୀ କରିଥିବା ଯାତାୟତ ସମସ୍ୟାର ସମାଧାନ ତୁରନ୍ତ କରାଯିବା ନେଇ ପ୍ରଶାସନ ପଦକ୍ଷେପ ନେବେ ବୋଲି ମଧ୍ୟ କହିଛନ୍ତି ଜିଲ୍ଲାପାଳ ।
ମାଲକାନଗିରିରୁ ପଞ୍ଚାନନ ଦାଶ, ଇଟିଭି ଭାରତ
