ମାଲକାନଗିରି : ପାଠ ପଢ଼ାର ସୁବିଧା ନଥିବାରୁ ସ୍ବାଭିମାନ ଅଞ୍ଚଳର ଛାତ୍ରଛାତ୍ରୀ ଆନ୍ଧ୍ରର ବିଦ୍ୟାଳୟରେ ପାଠ ପଢୁଛନ୍ତି । ଆସନ୍ତା ୧୫ ଦିନ ମଧ୍ୟରେ ବିଦ୍ୟାଳୟ ସହ ଛାତ୍ରାବାସ କାର୍ଯ୍ୟ ଆରମ୍ଭ ନହେଲେ କଂଗ୍ରେସ ଦଳ ଏପ୍ରିଲ ୫ ତାରିଖ ପରେ ସ୍ବାଭିମାନ ଅଞ୍ଚଳ ବନ୍ଦ ଡାକରା ଦେବ ବୋଲି ପୂର୍ବତନ ସାଂସଦ ପ୍ରଦୀପ ମାଝି ପ୍ରକାଶ କରିଛନ୍ତି ।
ସ୍ୱାଭିମାନ ଅଞ୍ଚଳର ପାଇଖାନା ଦୁର୍ନୀତିରେ ବି.ଡି.ଓ ଏବଂ କନିଷ୍ଠ ଯନ୍ତ୍ରୀଙ୍କୁ ନିଳମ୍ବନ କରାଯିବା ଦ୍ବାରା ପ୍ରକୃତ ହିତାଧିକାରୀ କ’ଣ ପାଇଲେ ବୋଲି ପ୍ରଶ୍ନ କରି ହିତାଧିକାରୀଙ୍କ ପାଇଁ ତୁରନ୍ତ ପାଇଖାନା ନିର୍ମାଣ କରିବାକୁ ସେ ଦାବି କରିଛନ୍ତି ।
ଏଥିସହ ଜିଲ୍ଲାର ବଣ୍ଡା ଘାଟିର ଅଣ୍ଡରାହାଲ ଓ ମୁଦୁଲିପଡା ପଞ୍ଚାୟତରେ ସ୍ଵଚ୍ଛ ଭାରତ ଯୋଜନାରେ ନିର୍ମାଣ ହୋଇଥିବା ୧୩୯୪ଟି ପାଇଖାନାରେ ବ୍ୟାପକ ଦୁର୍ନୀତି ହୋଇଥିବା ସେ ଅଭିଯୋଗ କରିଛନ୍ତି । ଅଧିକାଂଶ ସ୍ଥାନରେ ପାଇଖାନା ନଥିବା ବେଳେ ଯେଉଁଠି ଅଛି, ତାହା ବ୍ୟବହାର ଯୋଗ୍ୟ ନୁହେଁ ବୋଲି ଅଭିଯୋଗ କରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ନଚେତ କଂଗ୍ରେସ ପକ୍ଷରୁ ଜିଲ୍ଲାପାଳଙ୍କ କାର୍ଯ୍ୟାଳୟ ଓ ଖଇରପୁଟ ବ୍ଲକ ଘେରାଉ କରାଯିବ ବୋଳି ପୂର୍ବତନ ସାଂସଦ ମାଝି ପ୍ରକାଶ କରିଛନ୍ତି ।
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ
