ମାଲକାନଗିରି: କୁନି କୁନି ପିଲା। ପ୍ରାଥମିକ ବିଦ୍ୟାଳୟରେ ପାଠପଢୁଛନ୍ତି। ହେଲେ ଚନ୍ଦ୍ରପୃଷ୍ଠକୁ ଯିବା ଲାଗି ସ୍ବପ୍ନ ଦେଖିଛନ୍ତି। ଆଉ ଏହାକୁ କିଛି ମାତ୍ରାରେ ପୂରଣ କରିଛନ୍ତି ବିଦ୍ୟାଳୟର ଶିକ୍ଷକ । ବିଦ୍ୟାଳୟର କାନ୍ଥରେ ଜିଏସଏଲଭି ମାର୍କ ଥ୍ରୀ ଏମ ୱାନ ରକେଟ ତଥା ଚନ୍ଦ୍ରଯାନ-2 ଓ ଚନ୍ଦ୍ରର ଚିତ୍ର ଆଙ୍କି ସେଥିରେ ବସିବାର ସୁଯୋଗ ସୃଷ୍ଟି କରିଛନ୍ତି। ଏପରି ଦେଖିବାକୁ ମିଳିଛି ମାଲକାନଗିରି ମାଥିଲି ବ୍ଲକ ବି. ପୂଜାରୀଗୁଡା ଗାଁର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ। ଏଠାକାର ପିଲା ପ୍ରତିଦିନ ବିଦ୍ୟାଳୟକୁ ଆସି ପ୍ରାର୍ଥନା କରି ଚନ୍ଦ୍ରଯାନ-2 ଭିତରେ ଶ୍ରେଣୀ ଗୃହକୁ ଯାଉଛନ୍ତି। ଆଉ ପାଠ ଶେଷ ପରେ ଶ୍ରେଣୀଗୃହରୁ ଚନ୍ଦ୍ର ପଟେ ବାହାରୁଛନ୍ତି । ଯାହା ସେମାନଙ୍କୁ ଚନ୍ଦ୍ରଯାତ୍ରା କରିବାର ଏକ ଆନନ୍ଦ ଦେଉଛି।
ସେପଟେ ଉପାନ୍ତ ଇଲାକାରେ ଏପରି କରି ପିଲାଙ୍କ ସ୍ବପ୍ନକୁ କିଛି ପରିମାଣରେ ସାକାର କରିଛନ୍ତି ପ୍ରଧାନଶିକ୍ଷକ। ଏହାସହ ପିଲାଙ୍କ ମନରେ ବିଜ୍ଞାନ ପ୍ରତି ଆହୁରି ଅଧିକ ଆଗ୍ରହ ସୃଷ୍ଟି କରିଛନ୍ତି ସେ । ଅନ୍ୟପଟେ ଏହି ଚିତ୍ର ହେବାପରେ ବିଦ୍ୟାଳୟକୁ ଆସୁନଥିବା ପିଲା ମଧ୍ୟ ଚନ୍ଦ୍ରଯାନରେ ବସିବା ଲାଗି ନିୟମିତ ବିଦ୍ୟାଳୟକୁ ଆସୁଛନ୍ତି। ତା’ ଛଡା କିଛି ଅଭିଭାବକ ମଧ୍ୟ ଏହାକୁ ଦେଖିବାକୁ ଆସୁଥିବା ଜଣାପଡିଛି।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
