ମାଲକାନଗିରି: ବିଏସଏଫ ଯବାନଙ୍କୁ ବଡ ସଫଳତା । ସର୍ଚ୍ଚ ଅପରେସନ ବେଳେ ମାଟି ତଳୁ ବିପୁଳ ପରିମାଣର ବିସ୍ଫୋରକ ଓ ମାଓ ସାମଗ୍ରୀ ଠାବ କଲେ ଯବାନ । ମାଲକାନଗିରି ଜିଲ୍ଲାର କାଲିମେଳା ଥାନା ଓ ସ୍ବାଭିମାନ ଅଞ୍ଚଳର ଯୋଡାମ୍ବ ଥାନା ଅଞ୍ଚଳରେ ବିଏସଏଫ ଯବାନମାନେ କୁମ୍ବିଂ ଅପରେସନ କରି ମାଓବାଦୀମାନେ ମାଟିତଳେ ପୋତି ରଖିଥିବା ବିସ୍ଫୋରକ ସାମଗ୍ରୀ ଜବତ କରିଛନ୍ତି । ମାଟି ତଳୁ ୨ ଲିଟର ଟିଫିନ ଆଇଡି ୩ଟି, ୨ଟି ଦେଶୀ ବନ୍ଧୁକ, ୧୦୧ଟି ଜିଲୋଟିନ ଷ୍ଟିକ ଓ ଦୁଇଟି ଇଲେକ୍ଟ୍ରି ଡିଟୋନେଟର ଉଦ୍ଧାର ହୋଇଛି ।
ମିଳିଥିବା ସୂଚନା ଅନୁଯାୟୀ, କାଲିମେଳା ଥାନା ଅନ୍ତର୍ଗତ ଗମ୍ପାକୋଣ୍ଡା ମାରିଗାଟା ଓ ଟେକଗୁଡା ଜଙ୍ଗଲରେ ମାଓ ଗତିବିଧି ନେଇ ବିଏସଏଫକୁ ସୂଚନା ମିଳିଥିଲା । ଏହାପରେ ମଙ୍ଗଳବାର ସକାଳୁ ବିଏସଏଫ ୧୪୨ ବାଟାଲିୟନ ଯବାନମାନେ ଜଙ୍ଗଲରେ କୁମ୍ବିଂ ଅପରେସନ ଆରମ୍ଭ କରିଥିଲେ । ଅପରେସନ ବେଳେ ମାଓବାଦୀମାନେ ମାଟି ତଳେ ଲୁଚାଇ ରଖିଥିବା ବିପୁଳ ପରିମାଓର ବିସ୍ଫୋରକ ଓ ମାଓ ସାମଗ୍ରୀ ଠାବ କରାଯାଇଥିଲା । ଟିଫିନ ଆଇଡି, ଦେଶୀ ବନ୍ଧୁକ, ଜିଲୋଟିନ ଷ୍ଟିକ ସହ ଇଲେକ୍ଟ୍ରି ଡିଟୋନେଟର ଉଦ୍ଧାର କରିଥିଲେ ଯବାନ ।
ଏହାମଧ୍ୟ ପଢନ୍ତୁ: ନୂଆପଡାରେ ମାଓବାଦୀଙ୍କ ଲଙ୍କାକାଣ୍ଡ: ବିଟ୍ ହାଉସ୍ ଉଡାଇଲେ, ଜେସିବି ଜାଳିଲେ
ଅନ୍ୟପଟେ ଚିତ୍ରକୋଣ୍ଡା ବ୍ଲକ ସ୍ବାଭିମାନ ଅଞ୍ଚଳର ଯୋଡମ୍ବା ଥାନା ଅନ୍ତର୍ଗତ ଯନ୍ତ୍ରୀ ଠାରେ ମୁତୟନ ଥିବା ବିଏସଏଫ ୧୭୭ ବାଟାଲିୟନର ଯବାନଙ୍କୁ ମଧ୍ୟ ବଡ ସଫଳତା ମିଳିଛି । ସ୍ବାଭିମାନ ଅଞ୍ଚଳର ତାବେରୁ ଗ୍ରାମ ନିକଟ ଜଙ୍ଗଲରୁ ବଡ ଧରଣର ମାଓ ଡମ୍ପ ଠାବ କରିଛନ୍ତି ଯବାନ । ଡମ୍ପରୁ ଗୋଟିଏ ଷ୍ଟିଲ ଟିଫିନ ଆଇଡି, ୨ଟି ପ୍ଲାଷ୍ଟିକ ବକ୍ସ ଆଇଡି, ୬ଟି ଜିଲୋଟିନ ଷ୍ଟିକ ସମେତ ୩୦ ମିଟର କୋଡେକ୍ସ ତାର ଜବତ କରାଯାଇଛି । ଏନେଇ ଏକ ପ୍ରେସନୋଟ୍ ଜରିଆରେ ବିଏସଏଫ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି ।
ଏହାମଧ୍ୟ ପଢନ୍ତୁ : ମାଓବାଦୀଙ୍କ ଟାର୍ଗେଟରେ ବିଜେଡି ନେତା, ରାମନାକୁପୁଲିରେ ପୋଷ୍ଟର ମାରି ଚେତାଇଲା ଲାଲବାହିନୀ
ଏଠାରେ ଉଲ୍ଲେଖଯୋଗ୍ୟ ଯେ, ୪ ଦିନ ତଳେ ନୂଆପଡା ଜିଲ୍ଲାରେ ମାଓବାଦୀଙ୍କ ଉତ୍ପାତ ଦେଖିବାକୁ ମିଳିଥିଲା । ମାଓବାଦୀମାନେ ସଦର ଥାନା ଗୋଳାବନ୍ଧ ଗାଁରେ ଥିବା ବନ ବିଭାଗର ବିଟ୍ ହାଉସକୁ ବୋମାରେ ଉଡାଇ ଦେଇଥିଲେ ଏବଂ ଏକ ଜେସିବି ମେସିନ ମଧ୍ୟ ଜାଳି ଦେଇଥିଲେ । ଏହାପରେ ଗାଁର ବିଭିନ୍ନ ସ୍ଥାନରେ ସରକାର ବିରୋଧି ମାଓ ପୋଷ୍ଟର ଲଗାଇ ପଳାଇ ଥିଲେ ।
ଇଟିଭି ଭାରତ, ମାଲକାନଗିରି
