ମାଲକାନଗିରି: ପୁଣି ମାଲକାନଗିରି ଜିଲ୍ଲାରେ ବ୍ୟାନର ମାରି ନିଜ ଦବଦବା ଜାହିର କଲା ମାଓ ସଙ୍ଘଠନ । କାଲିମେଳା ଥାନା ଅନ୍ତର୍ଗତ ଗୋମ୍ପାକୋଣ୍ଡା ଗ୍ରାମପଞ୍ଚାୟତର ଦୂର୍ଗମ ଆଦିବାସୀ ଗାଁ କାନାଗୁଡାକୁ ଯିବା ବାଟରେ ଗୁରୁବାର ମାଓ ସଙ୍ଗଠନ ତରଫରୁ ଲାଲ ରଙ୍ଗର କପଡାରେ ପିଏଲଜିଏ ସପ୍ତାହ ପାଳନ କରିବା ପାଇଁ ଦର୍ଶାଯାଇଛି ।
ବିଶେଷ କରି PLGA ସପ୍ତାହ ପାଳନ ପାଇଁ ତିନି ଗୋଟି ବିଷୟକୁ ଦର୍ଶାଯାଇଛି । ପ୍ରଥମରେ ଚଳିତ ଡିସେମ୍ବର ମାସ ୨ ତାରିଖରୁ ୮ ତାରିଖ ପର୍ଯ୍ୟନ୍ତ ସପ୍ତାହ ବ୍ୟାପୀ PLGA ଦିବସକୁ ବିପ୍ଳବ ପରମ୍ପରା ଅନୁସାରେ ଗାଁ ଗାଁ ରେ ପାଳନ କରନ୍ତୁ । ଦ୍ବିତୀୟରେ ଶହିଦଙ୍କ ଅଧୁର ସ୍ବପ୍ନକୁ ପୂରା କରିବା ପାଇଁ ଶପଥ ନିଅନ୍ତୁ । ତୃତୀୟରେ ପୋଲିସ ଇନଫରମର ସାଜିଲେ ପ୍ରଜାକୋର୍ଟରେ ଦଣ୍ଡ ଦିଆଯିବ ଓ ପ୍ରତି ଗାଁର ଯୁବକ ଓ ଯୁବତୀ ମାଓ ସଙ୍ଘଠନରେ ଯୋଗ ଦେବା ଲାଗି ଦର୍ଶାଯାଇଛି। ତେବେ ଶେଷରେ ଲାଲ ସଲାମ୍, ସିପିଆଇ (ମାଓବାଦୀ) ଲେଖାରହିଛି ।
ବ୍ୟାନର ଲାଗିବା ପରେ ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ଦେଖିବାକୁ ମିଳିଥିବା ବେଳେ ଘଟଣାସ୍ଥଳରେ ବିଏସଏଫ ବାହିନୀ ପହଞ୍ଚି ବ୍ୟାନର ଜବତ କରିଛି । ଏଥିସହ ମାଓବାଦୀଙ୍କ ଏହି ପିଏଲଜିଏ ପାଳନକୁ ଗୁରୁତ୍ବ ଦେଇ କୁମ୍ବିଂ ଅପରେସନ ଜୋରଦାର କରାଯାଇଛି । ସୂଚନା ମୁତାବକ, ଜିଲ୍ଲାର କାଲିମେଳା ଥାନା ଅଞ୍ଚଳର ବିଭିନ୍ନ ଗ୍ରାମରେ ଲାଲବାହିନୀର ଦବଦବା ରହିଥିଲା । କିନ୍ତୁ 2016 ମସିହାରେ କାଲିମେଳା ଥାନା ଅଞ୍ଚଳର ଶତାଧିକ ଲୋକେ ମାଓ ସଙ୍ଘଠନର ଅତ୍ୟାଚାରକୁ ବିରୋଧ କରି ସରକାରଙ୍କ ଯୋଜନାରେ ଆକୃଷ୍ଟ ହୋଇ ମାଲକାନଗିରି ପୋଲିସ ନିକଟରେ ନିଜକୁ ଆତ୍ମ ସମର୍ପଣ କରିଥିଲେ ।
ଏହାପରେ ଜିଲ୍ଲା ପ୍ରଶାସନ କାଲିମେଳା ଥାନା ଅଞ୍ଚଳର ବିଭିନ୍ନ ଗ୍ରାମର ଗ୍ରାମବାସୀଙ୍କୁ ସମସ୍ତ ମୌଳିକ ସୁବିଧା ଯୋଗାଇ ଦେବାର ଭରସା ଦେଇଥିଲା। କିନ୍ତୁ ଆତ୍ମସମର୍ପଣ କରିବାର ତିନି ବର୍ଷ ବିତିଯାଇଥିଲେ ମଧ୍ୟ ଆଜି ସୁଦ୍ଧା କାଲିମେଳା ଥାନା ଅଞ୍ଚଳର ବିଭିନ୍ନ ଗ୍ରାମରେ ମୌଳିକ ସୁବିଧା ଅପହଞ୍ଚ ହୋଇ ରହିଛି । ତେବେ ଦୀର୍ଘ ବର୍ଷ ପରେ ପୁଣି ମାଓ ବ୍ୟାନର ଲାଗିବା ପରେ ଅଞ୍ଚଳ ବାସୀଙ୍କ ମନରେ ଭୟର ବାତାବରଣ ଦେଖିବାକୁ ମିଳିଛି ।
ମାଲକାନଗିରିରୁ ଜୟନ୍ତ ତିଆଡି, ଇଟିଭି ଭାରତ
