କୋରାପୁଟ: ସମଗ୍ର ରାଜ୍ୟରେ ଶୀତର ପ୍ରକୋପ ଧୀରେ ଧୀରେ ବଢିବାରେ ଲାଗିଛି । କୋରାପୁଟିଆ ଶୀତ ତାର ପ୍ରଭାବ ବିସ୍ତାର କରିବାରେ ପଛଘୁଞ୍ଚା ଦେଉନାହିଁ । କିନ୍ତୁ କୋରାପୁଟିଆ ମଣିଷ ବି ଶୀତର ତୀବ୍ରତାକୁ ସାମନା କରି ବିଭିନ୍ନ ଉପାୟରେ ଉପଭୋଗ କରୁଛନ୍ତି ।
କୋରାପୁଟରେ ଶୀତର ଆଗମନ ସହିତ କାକରର ପ୍ରଭାବ ବଢିବଢି ଚାଲେ । କେହି କମ୍ବଳ ଘୋଡାଇ ଚାଲବୁଲ କରୁଛନ୍ତି ତ ଆଉ କେହି ନିଆଁ ଜାଳି ଉଷ୍ମତାକୁ ଅନୁଭବ କରୁଛନ୍ତି । ଚା'ଦୋକାନରେ ଭିଡ ଜମାଇ ଗରମ ଗରମ ଚା'ପିଇ ମନ ପ୍ରାଣ ଓ ଶରୀରକୁ ସତେଜ ରଖିବାର ପ୍ରୟାସ କରୁଥିବା ବ୍ୟକ୍ତିଙ୍କ ସଂଖ୍ୟାବି କିଛି କମ୍ ନୁହେଁ । ତେବେ ସ୍ବାସ୍ଥ୍ୟ ପ୍ରତି ସଚେତନ ହେଉଥିବା ସହରବାସୀ ବ୍ୟାୟାମ କରି ଶୀତର ପ୍ରକୋପକୁ ସାମନା କରିବାକୁ ଶ୍ରେୟ ମଣୁଛନ୍ତି ।
କୋରାପୁଟ ପୌରପରିଷଦ ଆନୁକୂଲ୍ୟରେ ପରିଚାଳିତ ହେଉଥିବା ଚନ୍ଦନ ପୋଖରୀର ଉଦ୍ୟାନ ଓ ତନ୍ମମଧ୍ୟରେ ଥିବା ମୁକ୍ତାକାଶ ବ୍ୟାୟାମଶାଳା ଜନସାଧାରଣଙ୍କୁ ଏ ଦିଗରେ ବିଶେଷ ସହାୟକ ହୋଇପାରୁଛି । ଏହି ଉଦ୍ୟାନ ମଧ୍ୟରେ ସକାଳେ ସନ୍ଧ୍ୟାରେ ଲୋକେ ଚାଲିବା ସହ ବିଭିନ୍ନ ଉପକରଣକୁ ବ୍ୟବହାର କରି ବ୍ୟାୟାମ କରୁଛନ୍ତି । ସହରବାସୀ ଶୀତୁଆ ସକାଳ ଓ ସନ୍ଧ୍ୟାକୁ ଅତି ସହଜ ଓ ପ୍ରଭାବଶାଳୀ ମାଧ୍ୟମରେ ସାମନା କରିବାରେ ସକ୍ଷମ ହେଉଛନ୍ତି ।
କୋରାପୁଟ ସି ଏଚ ଶାନ୍ତାକାର, ଇଟିଭି ଭାରତ
