Dhamnagar Bypoll: ରୋଡ ଶୋ କରି ଭୋଟ୍‌ ମାଗିବ କଂଗ୍ରେସ

ଧାମନଗରରେ ରୋଡ଼ ଶୋ କରିବ କଂଗ୍ରେସ। ଜନସାଧାରଣଙ୍କ ବିଶ୍ୱାସ ହାସଲ କରିବାକୁ ପ୍ରସ୍ତୁତ ରହିଛି କଂଗ୍ରେସ। ଏନେଇ ସୂଚନା ଦେଇଛନ୍ତି ପିସିସି ସଭାପତି ଶରତ ପଟ୍ଟନାୟକ। ଅଧିକ ପଢନ୍ତୁ

ଭୁବନେଶ୍ବର: ଧାମନଗର ମତଦାନ ପାଇଁ ଦିନ କମିକମି ଯାଉଥିବା ବେଳେ ଜମୁଛି ପ୍ରଚାର । କଂଗ୍ରେସର ଷ୍ଟାର ପ୍ରଚାରକମାନେ ଧାମନଗର ମୈଦାନକୁ ଓହ୍ଲାଇଛନ୍ତି । ବିଜେଡି, ବିଜେପି ପକ୍ଷରୁ ଜୋରଦାର ବାଇକରାଲି ସହ ରୋଡ ଶୋ ଜାରି ରହିଥିବା ବେଳେ କଂଗ୍ରେସ ମଧ୍ୟ ଧାମନଗରରେ ରୋଡ ଶୋ କରିବ । ଜନସାଧାରଣଙ୍କ ବିଶ୍ୱାସ ହାସଲ କରିବାକୁ କଂଗ୍ରେସ ପ୍ରସ୍ତୁତ ରହିଥିବା କଥା କହିଛନ୍ତି ପିସିସି ସଭାପତି ଶରତ ପଟ୍ଟନାୟକ।

ଧାମନଗର ଉପନିର୍ବାଚନ ପାଇଁ ଜୋରଦାର ପ୍ରଚାର ଆରମ୍ଭ କରିଛି ଶାସକ ବିଜେଡି । ତେବେ ବିରୋଧୀ ବିଜେପି ମଧ୍ୟ ୱାର୍ଡ ବାରି ପ୍ରଚାରକୁ ଅଧିକ କ୍ରିୟାଶୀଳ କରିଥିବା ବେଳେ କଂଗ୍ରେସ ପୂର୍ଣ୍ଣ ପ୍ରସ୍ତୁତ ବୋଲି କହିଛନ୍ତି ପିସିସି ସଭାପତି ଶରତ ପଟ୍ଟନାୟକ ।

ଏନେଇ ପିସିସି ସଭାପତି କହିଛନ୍ତି, "ଆସନ୍ତା 27, 28 ଏବଂ 29 ତାରିଖରେ ଧାମନଗରରେ ରୋଡ଼ ଶୋ କରିବ କଂଗ୍ରେସ। ସମସ୍ତ ବ୍ଲକ ଓ ପଞ୍ଚାୟତରେ ଲୋକମାନଙ୍କ ପାଖକୁ କଂଗ୍ରେସ ନେତାମାନେ ଯିବେ। ଷ୍ଟାର ପ୍ରଚାରକ ତାଲିକାରେ ଥିବା ନେତା ପ୍ରଚାରକୁ ଓଲ୍ଲାଇ ସାରିଲେଣି । ଗତକାଲି ବିଧାୟକ ସୁରେଶ ରାଉତରାୟ ଧାମନଗରରେ ପ୍ରଚାରକୁ ଯାଇଥିଲେ। ତାଙ୍କ ସହ ବହୁ ସାଧାରଣ ଜନତା ଯୋଡି ହୋଇଛନ୍ତି। ଏହାର ଅର୍ଥ ବିଜେଡି ଓ ବିଜେପି ପ୍ରତି ଲୋକମାନଙ୍କର ଜନ ଅସନ୍ତୋଷ ରହିଛି। ଆଜି ଆହୁରି ମଧ୍ୟ କଂଗ୍ରେସ ନେତାମାନେ ମଧ୍ୟ ଯାଇଛନ୍ତି । ପୂର୍ବ ନିର୍ବାଚନରେ ଆମେ 7 ହଜାର ଭୋଟ ପାଇଥିଲୁ । ତେଣୁ କଂଗ୍ରେସର ଲଢେଇ ବିଜେଡି ସାଙ୍ଗରେ ହେବ । ଆମେ ମଧ୍ୟ ଏକ ନମ୍ବର ପାଇଁ ହିଁ ଲଢେଇ କରୁଛୁ । ବିଜେପି ବିଜେଡି ଉଭୟ ମିଶିକି ଅଛନ୍ତି । ବର୍ତ୍ତମାନ ଓଡ଼ିଶାର ଜନସାଧାରଣ ଉଭୟ ସରକାର ଉପରେ ଅତିଷ୍ଠ ହୋଇ ସାରିଲେଣି ।"

ଏନେଇ ବିଧାୟକ ସୁର ରାଉତରାୟ କହିଛନ୍ତି,"ଗତକାଲି ମୁଁ ଧାମନଗର ଯାଇଥିଲି । ବହୁତମାତ୍ରାରେ ଜମସମର୍ଥନ ମିଳିଥିଲା। ବହୁତ ମହିଳାମାନେ ଆସି କହିଲେ ଆମେ ହାତ ଚିହ୍ନରେ ଭୋଟ ଦେବୁ । ଶୁଣିକି ବହୁତ ଖୁସି ଲାଗିଲା । ଆମର କଂଗ୍ରେସର 27, 28 ଏବଂ 29 ତାରିଖରେ ଧାମନଗରରେ ରୋଡ଼ ଶୋ କରିବ । ମୁଁ ମଧ୍ୟ ସେଠାରେ ରହିବି ।"

ସୂଚନାଅନୁସାରେ, କଂଗ୍ରେସର ଷ୍ଟାର ପ୍ରଚାରକ ସୁର ରାଉତରାୟ ଧୂଷୁରି ଜୋନ୍‌ର ଧୂଷୁରି, ପାଳସାହି ଓ ଧାମନଗର ଏନ.ଏ.ସି ଅଞ୍ଚଳରେ ପ୍ରାର୍ଥୀ ବାବା ହରେକୃଷ୍ଣ ସେଠିଙ୍କୁ ନେଇ ଶନିବାର କ୍ୟାମ୍ପେନିଂ କରିଥିଲେ । ଏଥର କଂଗ୍ରେସକୁ ଭୋଟ ଦେବା ପାଇଁ ନିବେଦନ କରିଥିଲେ । ଆସନ୍ତା ୨୭ ତାରିଖରୁ ୩୦ ତାରିଖ ପର୍ଯ୍ୟନ୍ତ କଂଗ୍ରେସର ସମସ୍ତ ଷ୍ଟାର ପ୍ରଚାରକ ପ୍ରଚାର କରିବେ । ଅନ୍ୟପଟେ ସ୍ୱାଧୀନ ପ୍ରାର୍ଥୀ ରାଜେନ୍ଦ୍ର ଦାସ ଧାମନଗର ବ୍ଲକ ଅଞ୍ଚଳରେ ପ୍ରଚାର କରୁଛନ୍ତି । ରାଜେନ୍ଦ୍ରଙ୍କ ପାଇଁ ସାଧାରଣ ଲୋକେ ଷ୍ଟାର କ୍ୟାମ୍ପେନର ହୋଇଥିବାରୁ ସେ ନିଜେ ବୁଲି ବୁଲି ପ୍ରଚାର କରିଛନ୍ତି । କିନ୍ତୁ ଫଳାଫଳ କହିବ ଭୋଟରଙ୍କ ଉପରେ କେଉଁ ଦଳର ଷ୍ଟାର ପ୍ରଚାରକଙ୍କ ପ୍ରଭାବ ପଡୁଛି ।

ଇଟିଭି ଭାରତ, ଭୁବନେଶ୍ବର