ଭୁବନେଶ୍ବର: ଖୁବଶୀଘ୍ର ଓଡିଶାରେ ଗଡିବ ମେଟ୍ରୋ ଟ୍ରେନ । ଆସନ୍ତା ଜୁନ ମାସରେ ଭିତ୍ତିପ୍ରସ୍ତର ସ୍ଥାପନ କରିପାରନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭୁବନେଶ୍ୱର କଟକ ପାଇଁ ଡିପିଆର ପ୍ରସ୍ତୁତ ହୋଇଥିବା ବେଳେ ମେଟ୍ରୋ ଟ୍ରେନ ପାଇଁ ସର୍ଭେ ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଏଥିସହ ବର୍ଷ ଶେଷ ସୁଦ୍ଧା ମେଟ୍ରୋ କାମ ଆରମ୍ଭ ହେବ ।
ଓଡିଶାରେ ମେଟ୍ରୋ ଚଳାଚଳ ପାଇଁ ଦିଲ୍ଲୀ ମେଟ୍ରୋ ନିଗମ ସହ ଅନୁବନ୍ଧିତ ହୋଇଛି । ପ୍ରଥମ ପର୍ଯ୍ୟାୟରେ ଭୁବନେଶ୍ୱରରୁ କଟକ ଓ ପରବର୍ତ୍ତୀ ପର୍ଯ୍ୟାୟରେ ଭୁବନେଶ୍ୱରରୁ ଜଟଣୀ ଏବଂ ପୁରୀରେ ପହଞ୍ଚିବ ମେଟ୍ରୋ ସେବା । ନିକଟରେ ରାଜ୍ୟ ସରକାରଙ୍କ ଉଚ୍ଚ ସ୍ତରୀୟ ପ୍ରଶାସନିକ ଅଧିକାରୀ ମାନେ ଫିଲ୍ଡ ଭିଜିଟ କରି ତଦାରଖ କରିଥିଲେ ।
ଗତ 2019 ସାଧାରଣ ନିର୍ବାଚନରେ ବିଜେଡି ମେଟ୍ରୋ ଚଳାଚଳ ପାଇଁ ନିର୍ବାଚନୀ ଇସ୍ତାହାରରେ ଦେଇଥିଲା । ମୁଖ୍ୟମନ୍ତ୍ରୀ କିଛି ଦିନ ପୂର୍ବରୁ ଭୁବନେଶ୍ୱର କଟକ ମେଟ୍ରୋ ଟ୍ରେନ ଚଳାଚଳ ନେଇ ଘୋଷଣା କରିଥିଲେ । ଏହାର ସମସ୍ତ ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଏହା ମଧ୍ୟ ପଢନ୍ତୁ-ନବ ଦାସ ହତ୍ୟା ମାମଲା: JMFC କୋର୍ଟରେ ଚାର୍ଜସିଟ୍ ଦାଖଲ କଲା କ୍ରାଇମବ୍ରାଞ୍ଚ
ଉତ୍କଳ ଦିବସରେ ଭୁବନେଶ୍ବର ମେଟ୍ରୋ ଟ୍ରେନ୍ ପ୍ରସ୍ତାବକୁ ଅନୁମୋଦନ କରିଥିଲେ ମୁଖ୍ୟମନ୍ତ୍ରୀ । ପ୍ରଥମ ପର୍ଯ୍ୟାୟରେ ଏୟାରପୋର୍ଟରୁ ତ୍ରିଶୁଳିଆ ପର୍ଯ୍ୟନ୍ତ କାମକୁ ଅନୁମୋଦନ ମିଳିଥିବା ବେଳେ ରେଲୱେ ଷ୍ଟେସନ, ବାଣୀବିହାର, ପଟିଆ, ନନ୍ଦନକାନନ ଦେଇ ଚାଲିବ ମେଟ୍ରୋ ଟ୍ରେନ । ଏଥିପାଇଁ ଏଲିଭେଟେଡ୍ କରିଡର ବ୍ୟବସ୍ଥା କରିବାକୁ ପ୍ରସ୍ତାବ ଦିଆଯାଇଥିଲା । ରାସ୍ତାରେ ଭିଡ଼ କମାଇବା ପାଇଁ ମେଟ୍ରୋ ଚଳାଇବାକୁ ସରକାର ଏହି ବଡ଼ ପଦକ୍ଷେପ ନେଇଥିଲେ ।
ଏପ୍ରିଲ 1 ତାରିଖରେ ବିଜୁ ପଟ୍ଟନାୟକ ବିମାନ ବନ୍ଦର ଛକରୁ ସଚିବ ସ୍ତରୀୟ କମିଟିର ଫିଲ୍ଡ ଭିଜିଟ ଆରମ୍ଭ ହୋଇଥିଲା । ଭୋର ସମୟରେ ବିମାନବନ୍ଦର ଛକରୁ ଶିଶୁଭବନ ଛକ, ରାଜମହଲ ଛକ, ମାଷ୍ଟର କ୍ୟାଣ୍ଟିନ, ଜୟଦେବ ବିହାର, କଳିଙ୍ଗ ହସ୍ପିଟାଲ ଛକ, ବାଣୀବିହାର ଛକ, ପଟିଆ, ନନ୍ଦନକାନନ ଛକ ଦେଇ ତ୍ରିଶୂଳିଆ ଛକରେ ପହଞ୍ଚିଥିଲେ ବରିଷ୍ଠ ଅଧିକାରୀମାନେ । ରାସ୍ତାରେ ବିଭିନ୍ନ ସ୍ଥାନରେ ସରଜମିନ ସ୍ଥିତି ଅନୁଧ୍ୟାନ କରିଥିଲେ ଟିମ ସଦସ୍ୟ । ଭୁବନେଶ୍ୱର ଓ କଟକ ମଧ୍ୟରେ ମେଟ୍ରୋ ଟ୍ରେନ ଚଳାଚଳ ପାଇଁ ଭିର୍ତ୍ତିଭୂମି ରହିଛି ନା ନାହିଁ ତାର ଟିମ ଅନୁଧ୍ୟାନ କରିଥିଲା । ଭୁବନେଶ୍ବର,କଟକ, ପୁରୀକୁ ସଂଯୋଗ କରିବ ମେଟ୍ରୋ ଟ୍ରେନ।
ଇଟିଭି ଭାରତ, ଭୁବନେଶ୍ବର
