'ଶହୀଦ ଦେବାଶିଷଙ୍କ ପରିବାରକୁ ୧ କୋଟି ଅନୁକମ୍ପା ରାଶି ଦିଅନ୍ତୁ ସରକାର'

ଶହୀଦ ଦେବାଶିଷ ବିଶ୍ବାଳଙ୍କ ପରିବାରକୁ ୧ କୋଟି ଅନୁକମ୍ପା ରାଶି ଦେବାକୁ ଦାବି କଲା ଓଡ଼ିଶା ଆପ୍‌ । ଗତକାଲି ରାଜ୍ୟ ସରକାର ୨୫ ଲକ୍ଷ ଟଙ୍କା ଦେବାକୁ ଘୋଷଣା କରିଥିଲେ । ଅଧିକ ପଢନ୍ତୁ

ଭୁବନେଶ୍ବର: ଶହୀଦ ଓଡ଼ିଆ ବୀର ଯବାନ ଦେବାଶିଷ ବିଶ୍ବାଳଙ୍କ ପରିବାରକୁ ରାଜ୍ୟ ସରକାର ୧ କୋଟି ଅନୁକମ୍ପା ରାଶି ଦେବାକୁ ଦାବି କଲା ଆମ ଆଦମୀ ପାର୍ଟି । ବାହାର ରାଜ୍ୟରେ ୧ କୋଟି ଅର୍ଥ ରାଶି ପ୍ରଦାନ କରାଯାଉଥିବା ବେଳେ ଓଡ଼ିଶାରେ ଏହା ମାତ୍ର ୨୫ ଲକ୍ଷ ରହିଛି । ଏହାକୁ ବୃଦ୍ଧି କରି ୧ କୋଟି କରିବାକୁ ରାଜ୍ୟ ସରକାରଙ୍କ ନିକଟରେ ଦାବି କରିଛି ଆମ ଆଦମୀ ପାର୍ଟି। ଏହାସହ ସେହି ପରିବାରର ଜଣେ ସଦସ୍ୟଙ୍କୁ ସରକାର ଚାକିରି ଦେବାକୁ ମଧ୍ୟ ଦାବି ହୋଇଛି ।

ଗତ ୨୦ ତାରିଖରେ ଜମ୍ମୁକାଶ୍ମୀରର ପୁଞ୍ଚ ଅଞ୍ଚଳରେ ହୋଇଥିବା ଆତଙ୍କୀ ହମଲାରେ ୫ ଜଣ ଭାରତୀୟ ଯବାନ ଶହୀଦ ହୋଇଛନ୍ତି । ଆମ ଆଦମୀ ପାର୍ଟି ଓଡିଶା ପକ୍ଷରୁ ଶହୀଦମାନଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି । ଏହି ୫ ଜଣ ଶହୀଦଙ୍କ ମଧ୍ୟରେ ସାକ୍ଷୀଗୋପାଳ ନିବାସୀ ଓଡ଼ିଆ ଯବାନ ଦେବାଶିଷ ବିଶ୍ଵାଳ ମଧ୍ୟ ରହିଛନ୍ତି । ରାଜ୍ୟ ସରକାରଙ୍କ ପକ୍ଷରୁ ଶହୀଦ ଓଡ଼ିଆ ଯବାନଙ୍କ ପରିବାରକୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ୨୫ ଲକ୍ଷ ଟଙ୍କାର ଅନୁକମ୍ପା ରାଶି ପ୍ରଦାନ କରାଯିବ ବୋଲି ଘୋଷଣା କରାଯାଇଛି ।

ଏପଟେ କିନ୍ତୁ ଦିଲ୍ଲୀ ସରକାର ୨୦୧୮ ମସିହାରୁ କର୍ତ୍ତବ୍ୟରେ ଥାଇ ପ୍ରାଣ ହରାଉଥିବା ଦିଲ୍ଲୀ ନିବାସୀ ସୈନିକ, ପୋଲିସ କର୍ମୀ, ଅଗ୍ନିଶ୍ରମ କର୍ମଚାରୀ ଓ ହୋମଗାର୍ଡଙ୍କ ପରିବାରଙ୍କୁ ୧ କୋଟି ଟଙ୍କା ଲେଖାଏଁ ସମ୍ମାନ ରାଶି ପ୍ରଦାନ କରି ଆସୁଛନ୍ତି । ପଞ୍ଜାବରେ ମଧ୍ୟ ନିକଟରେ ନିର୍ବାଚିତ ହୋଇ ଆସିଥିବା ଆପ ସରକାର ସମ୍ମାନ ରାଶି ୧ କୋଟି ଟଙ୍କାକୁ ବୃଦ୍ଧି କରିଛନ୍ତି । ଗତବର୍ଷ ଗୁଜରାଟ ବିଧାନସଭା ପାଇଁ ହୋଇଥିବା ନିର୍ବାଚନ ପୂର୍ବରୁ ଆମ ଆଦମୀ ପାର୍ଟିର ଚାପ ଯୋଗୁଁ ସେଠିକାର ରାଜ୍ୟ ସରକାର ମଧ୍ୟ ଏହି ସମ୍ମାନ ରାଶି ୧ ଲକ୍ଷ ଟଙ୍କାରୁ ୧ କୋଟି ଟଙ୍କାକୁ ବୃଦ୍ଧି କରିଛନ୍ତି ।

ବୀର ଯବାନ ଶହୀଦ ହେବା ପରେ ଦେଶର କ୍ଷତି ହେବା ସଙ୍ଗେ ସଙ୍ଗେ ଶହୀଦ ପରିବାରର ଯେଉଁ କ୍ଷତି ହୁଏ କୌଣସି ସରକାର ସେହି ପରିବାରକୁ ଯେତେ ଅଧିକ ସମ୍ମାନ ରାଶି ଦେଲେ ମଧ୍ୟ କ୍ଷତି କେବେ ପୂରଣ କରିପାରିବେ ନାହିଁ । ତେବେ ଶହୀଦ ବିଶ୍ଵାଳଙ୍କ ସହିତ ପୁଞ୍ଚ ଘଟଣାରେ ପଞ୍ଜାବ ରାଜ୍ୟର ଆଉ ୪ ଜଣ ଯବାନ ମଧ୍ୟ ଶହୀଦ ହୋଇଛନ୍ତି । ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ ସେମାନଙ୍କ ପରିବାର ପାଇଁ ୧ କୋଟି ଟଙ୍କା ଲେଖାଏଁ ସମ୍ମାନ ରାଶି ଓ ସେମାନଙ୍କ ପରିବାରର ଜଣେ ଲେଖାଏଁ ସଦସ୍ୟଙ୍କୁ ସରକାରୀ ଚାକିରି ଦେବେ ବୋଲି ଘୋଷଣା କରିଛନ୍ତି।

ଏନେଇ ଆମ ଆଦମୀ ପାର୍ଟି ସାମ୍ବାଦିକ ସମ୍ମିଳନୀ କରି ରାଜ୍ୟ ସରକାରଙ୍କୁ ଘେରିଛି । ଆଉ ପ୍ରଶ୍ନ କରି କହିଛି, "ଓଡ଼ିଶା ସରକାର ମଧ୍ୟ ସେହି ପରିମାଣର ସମ୍ମାନ ରାଶି ଦେବାରେ କାହିଁକି କାର୍ପଣ୍ୟତା ପ୍ରଦର୍ଶନ କରୁଛନ୍ତି ? ୨ ଲକ୍ଷ କୋଟି ଟଙ୍କାର ବଜେଟ ଥିବା ଓଡ଼ିଶା ସରକାରଙ୍କ ରାଜକୋଷରୁ ଏହି ରାଶି ଦେଲେ କ'ଣ ତାହା ଖାଲି ହୋଇଯିବ ? ଓଡ଼ିଆ ଯବାନ କ'ଣ ଦିଲ୍ଲୀ ଓ ପଞ୍ଜାବର ଯବାନଙ୍କଠାରୁ କୈାଣସି ହିସାବରେ କମ ଅଟନ୍ତି ? ଓଡିଶା ଆପ ମୁଖ୍ୟମନ୍ତ୍ରୀଙ୍କ ପାଖରେ ଦାବି କରୁଛି ଯେ ସେ ଏହି ସମ୍ମାନ ରାଶିକୁ ୧ କୋଟି ଟଙ୍କାକୁ ବୃଦ୍ଧି କରନ୍ତୁ ଓ ଏହାକୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ଏକ୍ସଗ୍ରାସିଆ ଆକାରରେ ନଦେଇ ସରକାରଙ୍କ ବଜେଟରୁ ଦେବା ପାଇଁ ଆଇନ ଆଣନ୍ତୁ ।"

ଇଟିଭି ଭାରତ, ଭୁବନେଶ୍ବର