ଖୋର୍ଦ୍ଧା: ଶାଳକର ବିବାହ ଭୋଜିକୁ ଆସି ନିଖୋଜ ହୋଇଗଲେ ଭିଣୋଇ । ଏପରି ଏକ ଘଟଣା ଘଟିଛି ବୋଲଗଡ ଥାନା ହାଟବସ୍ତ ଗ୍ରାମରେ । ନିଖୋଜ ବ୍ୟକ୍ତି ବୋଲଗଡ ଅନ୍ତର୍ଗତ ପୁବୁସାହି ଗ୍ରାମର ବାପି ସାମନ୍ତରାୟ । ସେ ହାଟବସ୍ତ ନିବାସୀ ନିଜ ଶାଳକ ଦିପୁ ଚମ୍ପତିଙ୍କ ବିବାହ ଭୋଜିକୁ ଆସିଥିଲେ । ବାହାଘରରେ ଅତ୍ୟଧିକ ମଦ୍ୟପାନ କରିବା ଯୋଗୁଁ ପୋଖରୀରରେ ବୁଡି ସେ ନିଖୋଜ ହୋଇଯାଇଛନ୍ତି । ଓଡ୍ରାଫ ଟିମ୍ ସହ ବୋଲଗଡ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଜାରି ରଖିଛନ୍ତି ।
ଯାହା ସୂଚନା ମିଳିଛି, ବୁଧବାର ବିଳମ୍ବିତ ରାତିରେ ବାପି କିଛି ଯୁବକଙ୍କ ସହ ହାଟବସ୍ତ ଗ୍ରାମ ନିକଟରେ ଥିବା ବେଗୁନିଆ ପୋଖରୀ କୂଳରେ ବସି ମଦ ପିଇଥିଲେ । ପ୍ରଚୁର ମଦପାନ କରିବା ଯୋଗୁଁ ଅସାବଧାନତା ବଶତଃ ସେ ପୋଖରୀ ଭିତରେ ଖସି ପଡିଥିଲେ (man goes missing after drowning in pond) । ଗ୍ରାମବାସୀ ବୋଲଗଡ଼ ଅଗ୍ନିଶମ ବାହିନୀକୁ ରାତିରେ ଖବର ଦେବା ସହ ରାତିସାରା ପୋଖରୀରେ ଖୋଜାଖୋଜି କରିଥିଲେ ମଧ୍ୟ ବାପିଙ୍କ ପତ୍ତା ମିଳିନଥିଲା ।
ଏହାମଧ୍ୟ ପଢନ୍ତୁ: ଏମିତି ଏକ ସ୍କୁଲ: ୩୬୫ ଦିନ ଖୋଲା, ଦୁଇ ହାତରେ ଲେଖନ୍ତି ଛାତ୍ରଛାତ୍ରୀ
ଆଜି ସକାଳୁ ଖୋର୍ଦ୍ଧାରୁ ଗୋଟିଏ ଓଡ୍ରାଫ ଟିମ ସହ ବୋଲଗଡ ଅଗ୍ନିଶମ ବାହିନୀ ପହଞ୍ଚି ପୋଖରୀରେ ଖୋଜାଖୋଜି ଜାରି ରଖିଛନ୍ତି । ହେଲେ ଏଯାଏଁ ତାଙ୍କର କିଛି ସନ୍ଧାନ ମିଳିନାହିଁ । ସ୍ଥାନୀୟ ଧୀବର ମଧ୍ୟ ପୋଖରୀରେ ଖୋଜାଖୋଜି ଜାରି ରଖିଛନ୍ତି ।
ଇଟିଭି ଭାରତ, ଖୋର୍ଦ୍ଧା
