ରାୟଗଡା: ଆଜି(ଶୁକ୍ରବାର) ପବିତ୍ର କାର୍ତ୍ତିକ ପୂର୍ଣ୍ଣମୀ ଓ ବୋଇତ ବନ୍ଦାଣ ଉତ୍ସବ ପାଳିତ ହୋଇଯାଇଛି । ଏହି ଅବସରରେ ଗୁଣୁପୁର ବଂଶଧାରା ନଦୀ କୂଳର ତୁର୍କାନିଗୁଡା, ପ୍ରଧାନୀ ଗୁଡା, କୋତାଲୁଗୁଡା, କୁମ୍ଭାର ସାହି, ବିକ୍ରମପୁର ଲିମା ମେଡା ଏବଂ ବଂଶଧାରା ନଦୀ କୂଳର ବିଭିନ୍ନ ସ୍ଥାନରେ ଆଜି ଶ୍ରଦ୍ଧାଳୁ ମାନଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା । ଗତକାଲି ରାତ୍ରଠାରୁ ଗୁଣୁପୁର ସହର ଏକ ପ୍ରକାର ଉତ୍ସବମୁଖର ହୋଇପଡିଥିଲା ।
ଏହି ଅବସରରେ ବେଦାନ୍ତ ଆଶ୍ରମ କମିଟି ପକ୍ଷରୁ ଅଖଣ୍ଡ ଯଜ୍ଞାହୁତି, ଦ୍ଵାଦଶ ଜ୍ୟୋତିର୍ଲିଙ୍ଗ ଦର୍ଶନ, ପୂର୍ଣ୍ଣ ଆହୁତି ଏବଂ ବିଭିନ୍ନ କାର୍ଯ୍ୟକ୍ରମ ହେବାକୁ ନିଷ୍ପତ୍ତି ନିଆଯାଇଛି । ସେହିପରି ରାୟଗଡ ଜିଲ୍ଲାର ଗଳି କାନ୍ଦିରେ ଚାଲିଛି ପୂର୍ଣ୍ଣିମା ଉତ୍ସବ । ଏହି ଅବସରରେ ଜିଲ୍ଲାରେ ବୋହିଯଉଥିବା ବଂଶଧାରା, ନାଗାବଳୀ ଓ ମହେନ୍ଦ୍ର ତନୟା ନଦୀ କୂଳରେ ଭିଡ ଜମିଛି ଶ୍ରଦ୍ଧଳୁଙ୍କ । ବଡି ଭୋରୁ କଦଳୀ ବାହୁଙ୍ଗାରୁ ପ୍ରସ୍ତୁତ ଡଙ୍ଗା ଭସାଇଥିଲେ ଶ୍ରଦ୍ଧଳୁ । କଦଳୀ ବାହୁଙ୍ଗାରୁ ପ୍ରସ୍ତୁତ ଡଙ୍ଗାରେ ପାନ, ଗୁଆ ଥୋଇ ‘‘ଆ କା ମା ବୈ’’ ଡାକରେ ଫାଟି ପଡୁଥିଲା ନଦୀ ପୁଷ୍କରଣୀ ତୁଠ । ସେପଟେ କାର୍ତ୍ତିକ ହବିଷାଳୀ ନଦୀ କୂଳରେ ବାଲୁକା ସ୍ଥାପନ କରି ଭୀମ ପୂଜା ସହ ରାଇ ଦାମୋଦରଙ୍କୁ ପୂଜା କରିଛନ୍ତି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
