ଖୋର୍ଦ୍ଧା : ବୋଲଗଡ ବ୍ଳକ ମାଣିବନ୍ଧ ପଞ୍ଚାୟତରେ ଇନ୍ଦିରା ଆବସ ଓ ମୋ କୁଡିଆ ଯୋଜନାକୁ ଚଞ୍ଚକତା କରି ଯୋଗ୍ୟ ହିତାଧିକାରୀଙ୍କୁ ବାଦ ଦେଇ ଅଯୋଗ୍ୟଙ୍କୁ ପ୍ରଦାନ କରାଯାଇଥିବା ଅଭିଯୋଗ ହୋଇଛି । ଏ ନେଇ ମଙ୍ଗଳବାର ବୋଲଗଡ ବିଡ଼ିଓ ଧୋବେଇ ନାଏକଙ୍କୁ ପଞ୍ଚାୟତର ବଡପଦର , ମାଣିବନ୍ଧ, ସାମନ୍ତରାପୁର , ମଙ୍ଗରାଜପୁର, ଏକଡାଳିଆ, ବଡନୟାପଲ୍ଲୀ, ଛାମୁଣ୍ଡିଆପଲ୍ଲୀ ପ୍ରମୁଖ ଗାଁର ଯୋଗ୍ୟ ହିତାଧିକାରୀଙ୍କ ସହିତ ସ୍ଥାନୀୟ ନେତୃମଣ୍ଡଳୀ ସାମିଲି ହୋଇ ଦାବୀପତ୍ର ପ୍ରଦାନ କରିଛନ୍ତି ।
ଲିଖିତ ଅଭିଯୋଗ ଅନୁଯାୟୀ ପଞ୍ଚାୟତର ଧନୀ ଶ୍ରେଣୀର ଲୋକମାନଙ୍କୁ ଏହି ଯୋଜନାରେ ସାମିଲ କରାଯାଇ ଘର ପ୍ରଦାନ କରାଯାଇଛି । ପଞ୍ଚାୟତ ଖାତାରେ ଲିଖିତ ଯୋଗ୍ୟ ହିତାଧିକାରୀ ସିରିଏଲ ନମ୍ବରକୁ ଆଗପଛ କରାଯାଇ ଅଯୋଗ୍ୟମାନଙ୍କୁ ପ୍ରଦାନ କରାଯାଇଥିବା ନେଇ ସଙ୍ଗୀନ ଅଭିଯୋଗ ହୋଇଛି । ତେବେ କଂଗ୍ରେସ ବିଧାୟକ ପ୍ରାର୍ଥୀ ପ୍ରଦୀପ କୁମାର ସାହୁ, ପୂର୍ବତନ ଜିଲାପରିଷଦ ସଭ୍ୟ ପବିତ୍ର ମୋହନ ବଳିୟାରସିଂହ, ପୂର୍ବତନ ସରପଞ୍ଚ ବିଜୟ ପ୍ରଧାନ, ପୂର୍ବତନ ସମିତିସଭ୍ୟ ନବଘନ ମଲ୍ଲିକ ଏକଜୁଟ ହୋଇ ଦାବିପତ୍ର ପ୍ରଦାନ ସହ ତଦନ୍ତ କରିବାପାଇଁ ଅନୁରୋଧ କରିଛନ୍ତି ।
ଆସନ୍ତା ୧୫ ଦିନ ମଧ୍ୟରେ ପ୍ରଶାସନ ଏହାର ବିଚାର ନକଲେ ଆନ୍ଦୋଳନର ପନ୍ଥା ଗ୍ରହଣ କରିବେ ବୋଲି ଅଭିଯୋଗକାରୀମାନେ ଚେତାବନୀ ଦେଇଛନ୍ତି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
