ଭୁବନେଶ୍ୱର: ନିଶା କାରବାର ଉପରେ ରୋକ ଲଗାଇବାକୁ ଚାଲିଛି ଅପରେସନ । ସ୍ପେଶାଲ କ୍ରାଇମ୍ ୟୁନିଟର ଅଣ୍ଡର କଭର ଅଫିସର କରିଛନ୍ତି ବଡ ନେଟୱର୍କର ପର୍ଦ୍ଦାଫାସ । କୋଲକାତାରୁ ଭୁବନେଶ୍ୱର ବ୍ରାଉନସୁଗାର ଆଣି ବିକୁଥିବା ପୁରୀର ୨ ବେପାରୀଙ୍କୁ କାବୁ କରିଛି ପୋଲିସ । ଗ୍ରାହାକ ବେଶରେ ତାଙ୍କ ସହ ଡିଲ କରି ଦୁଇ ଜଣଙ୍କୁ ଧରିଛି ସ୍ପେଶାଲ କ୍ରାଇମ୍ ୟୁନିଟ । ଅଭିଯୁକ୍ତଙ୍କ ମଧ୍ୟରେ ଜଣେ ଡ୍ରାଇଭର ଆଉ ଜଣେ ବ୍ୟବସାୟୀ ଥିବା ଜଣାପଡିଛି । ଦୁହେଁ ମିଶି କରୁଥିଲେ ବଡ଼ ଧରଣର ବ୍ରାଉନସୁଗାର ଡିଲ୍ । ଫୁଲେଶ୍ୱରି ବସ୍ତିରେ ବାଇକ ଯୋଗେ ଆସି ଡିଲ କରୁଥିବା ବେଳେ ଗିରଫ କରିଛି SCU ଟିମ । ସେମାନଙ୍କ ଠାରୁ ୧ କେଜିର ବ୍ରାଉନସୁଗାର ଜବତ କରାଯାଛି । ଯାହାର ମୂଲ୍ୟ କୋଟିଏ ଟଙ୍କାରୁ ଊର୍ଦ୍ଧ୍ୱ ହେବ । ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ ଡେଲାଙ୍ଗର ନିରଞ୍ଜନ ପାଟଯୋଶୀ ଓ ପ୍ରଦୀପ୍ତ ସାହୁ ।
ମିଳିଥିବା ସୂଚନା ଅନୁସାରେ, ନିରଞ୍ଜନ ଜଣେ ଟ୍ରକ ଡ୍ରାଇଭର । ସେ ଅନେକ ସମୟରେ ପୁରୀ ଓ ଭୁବନେଶ୍ୱରରୁ କିଛି ସାମଗ୍ରୀ ନେଇ କୋଲକାତା ଯାଇଥାନ୍ତି । ସେଠାରୁ ପିଆଜ ଆଣି ଭୁବନେଶ୍ୱର କିମ୍ବା ପୁରୀ ଆସନ୍ତି । ଏହାରି ମଧ୍ୟରେ ସେ ବ୍ରାଉନସୁଗାର ସପ୍ଲାଏଙ୍କ ଏକ ବଡ଼ ନେଟୱର୍କର ପାଲରେ ପଡ଼ିଥିଲେ । ନିରଞ୍ଜନ କୋଲକାତା ବେପାରୀଙ୍କ ଠାରୁ ପିଆଜ ଆଣିବା ଆଳରେ ବ୍ରାଉନସୁଗାର ଆଣି ଭୁବନେଶ୍ୱରରେ ପହଞ୍ଚାଉଥିଲେ । ଏହାପରେ ପ୍ରଦୀପ୍ତ ସାହୁଙ୍କ ସହ ମିଶି ବ୍ରାଉନସୁଗାର ବେପାର କରୁଥିଲେ । ଏ ସମ୍ପର୍କରେ କୌଣସି ସୂତ୍ରରୁ ଖବର ପାଇ ପୋଲିସ । ଯୋଜନା ଅନୁସାରେ ସ୍ପେଶାଲ କ୍ରାଇମ୍ ୟୁନିଟ ଛଦ୍ମବେଶରେ ଫୁଲେଶ୍ବରି ବସ୍ତିକୁ ଯାଇ ଦୁଇ ବେପାରୀଙ୍କ ସହ ଡିଲ କରିବା ଆଳରେ ସେମାନଙ୍କୁ ମାଡି ବସିଥିଲା । ଦୁହିଙ୍କୁ ପୋଲିସ ହେପାଜତକୁ ନେବା ସହ ୧ କେଜିର ବ୍ରାଉନସୁଗାର ଜବତ କରିଛି । ସେମାନଙ୍କ ଠାରୁ ୨ଟି ବାଇକ ମଧ୍ୟ ଜବତ କରାଯାଇଛି ।
ଏହାମଧ୍ୟ ପଢନ୍ତୁ: ଏସ୍ଟିଏଫ୍ ଜାଲରେ ବ୍ରାଉନ୍ସୁଗାର ବେପାରୀ, ଗିରଫ ହେଲେ କୋର୍ଟ କର୍ମଚାରୀ
ଦୀର୍ଘ ମାସେ ହେଲା ଏହି ବ୍ରାଉନସୁଗାର ବେପାରୀଙ୍କ ଉପରେ ନଜର ରଖିଥିଲା ପୋଲିସ । ପୋଲିସ ଡେଲାଙ୍ଗ ଅଞ୍ଚଳରୁ ଏମାନଙ୍କ ପିଛା କରି ଦିଘା ପର୍ଯ୍ୟନ୍ତ ଯାଇଥିଲା । ଏହାପରେ ପୋଲିସ ଅଭିଯୁକ୍ତମାନଙ୍କୁ ଗିରଫ କରିବା ପାଇଁ ପୁଣି ଜାଲ ବିଛାଇଥିଲା । ଏକ ମାସର ପରିଶ୍ରମ ପରେ ଶେଷରେ ସେମାନଙ୍କୁ କାବୁ କରିଛି ପୋଲିସ । ପୋଲିସ କମିସନର କହିଛନ୍ତି,"ବ୍ରାଉନସୁଗାର ବା ନିଶା ବିରୋଧରେ ୨୦୨୧ରୁ ୨୨ଓ ୨୩ ପର୍ଯ୍ୟନ୍ତ ଏହିପରି ସ୍ପେଶାଲ ଅପରେସନ ଜାରି ରହିଛି । ନିଶା ଓ ନିଶା ମାଫିଆଙ୍କୁ କାବୁ କରିବାକୁ ସ୍ପେଶାଲ କ୍ରାଇମ୍ ୟୁନିଟ ତାର ଅଭିଯାନ ଜାରି ରଖିଛି ।"
ଇଟିଭି ଭାରତ, ଭୁବନେଶ୍ୱର
