ବିଜେବି କଲେଜରେ ନାମଲେଖା ବାତିଲ, ନ୍ୟାୟ ଦାବିରେ ଧାରଣାରେ ଦିବ୍ୟାଙ୍ଗ ଛାତ୍ର ଅଙ୍କିତ

ପ୍ରଥମେ ନାଁ ଲେଖାଇ ଏବେ ଯୋଗ୍ୟ ନୁହେଁ ବୋଲି କହୁଛି କଲେଜ । ନ୍ୟାୟ ପାଇଁ ଧାରଣାରେ ବିଜେବି କଲେଜ ଦିବ୍ୟାଙ୍ଗ ଛାତ୍ର ଅଙ୍କିତ । ଅଧିକ ପଢନ୍ତୁ

ଭୁବନେଶ୍ବର: ନ୍ୟାୟ ପାଇଁ ଧାରଣାରେ ବିଜେବି କଲେଜ ଦିବ୍ୟାଙ୍ଗ ଛାତ୍ର ଅଙ୍କିତ ମାଝୀ । ଅଙ୍କିତ ଚଳିତ ଶିକ୍ଷା ବର୍ଷରେ ପିଜିରେ ନାମ ଲେଖାଇଥିଲେ । ଆଉ ତାଙ୍କୁ ଭୂଗୋଳ ବିଭାଗର ବିଜେବି କଲେଜର ପିଜି ଛାତ୍ର ବୋଲି ପରିଚୟ ପତ୍ର ମଧ୍ୟ ମିଳିଲା । ହେଲେ ୧୫ ଦିନ ପରେ ତାଙ୍କ ନାମଲେଖା ବାତିଲ ହୋଇଛି ବୋଲି କଲେଜ କର୍ତ୍ତୃପକ୍ଷଙ୍କ ପକ୍ଷରୁ ସେ ଜାଣିବାକୁ ପାଇଛନ୍ତି । ସେ ଏହି ବିଭାଗ ପାଇଁ ଯୋଗ୍ୟ ନୁହଁନ୍ତି ବୋଲି କୁହାଯାଇଛି । ଯଦି ସେ ଯୋଗ୍ୟ ନଥିଲେ ତେବେ କଲେଜ ତାଙ୍କର ନାମ ଲେଖାଇଥିଲା କିପରି ଆଉ ଯଦି ନାମଲେଖା ପରେ ନା କଟିଛି ତେବେ କାହିଁକି ୧୫ ଦିନ ପରେ ଖବର ଦେଉଛନ୍ତି ବୋଲି ପ୍ରଶ୍ନ କରି ଧାରଣାରେ ଅଙ୍କିତ ।

ଦିବ୍ୟାଙ୍ଗ ଛାତ୍ର ଅଙ୍କିତଙ୍କ ଅଭିଯୋଗ ଚଳିତ ବର୍ଷର ନାମଲେଖା ଗୋଟିଏ ପଟେ ସରିଯାଇଥିବା ବେଳେ ଏବେ ସେ ବିଭାଗ ପାଇଁ ଯୋଗ୍ୟ ନୁହଁନ୍ତି ବୋଲି କଲେଜ କର୍ତ୍ତୃପକ୍ଷ କହୁଛନ୍ତି । ଏଭଳି ପରିସ୍ଥିତିରେ ସେ ଏବେ କେଉଁଠି ନାମ ଲେଖାଇବେ ଆଉ କୁଆଡେ ଯିବେ ? ତେଣୁ ତାଙ୍କ ପାଠପଢାର 1 ବର୍ଷ କଲେଜ କର୍ତ୍ତୃପକ୍ଷଙ୍କ ଭୁଲ ଯୋଗୁଁ ହରାଇଲେ ବୋଲି ସେ ଅଭିଯୋଗ କରିଛନ୍ତି । ଏଣୁ ନ୍ୟାୟ ଦାବିରେ ସେ କଲେଜ କ୍ୟାମ୍ପସରେ ଧାରଣାରେ ବସି ରହିଛନ୍ତି । ହାତରେ ଏକ ପ୍ଲା କାର୍ଡ ଧରି ଧାରଣାରେ ବସି ରହିଥିବା ଦେଖିବାକୁ ମିଳିଛି । ଯେପର୍ଯ୍ୟନ୍ତ କଲେଜ କର୍ତ୍ତୃପକ୍ଷ ନାମଲେଖାର ସଠିକ କାରଣ ନ ଦର୍ଶାଇଛନ୍ତି ଓ ତାଙ୍କୁ ଆଉ ଥରେ ନାମଲେଖା ପାଇଁ ସୁଯୋଗ ଦେଇନାହାନ୍ତି ସେପର୍ଯ୍ୟନ୍ତ ସେ ଧାରଣାରେ ବସି ରହିବେ ବୋଲି କହିଛନ୍ତି ।

'ମୁଁ ଓଡ଼ିଶାରେ ୨ ସ୍ଥାନରେ ଥିଲି':- ଅଙ୍କିତ ଆହୁରି କହିଛନ୍ତି, "ମୁଁ ପିଜି ପାଇଁ ଯେଉଁ ପ୍ରବେଶିକା ପରୀକ୍ଷା ଦେଇଥିଲି ସେଥିରେ ମୁଁ ଓଡ଼ିଶାରେ ୨ ସ୍ଥାନରେ ରହିଥିଲି । ଆଉ ମୁଁ ଯୁକ୍ତ ତିନି ମଧ୍ୟ ଏଇଠି ପଢିଥିଲି । ସବୁ ଦିଗକୁ ଦେଖି ଓ ମୋ ମାର୍କର କାଉନସିଲକୁ ନେଇ ମୋର ଭୂଗୋଳ ବିଭାଗରେ ନାମଲେଖା ହୋଇଥିଲା । ହେଲେ ଏବେ ସେମାନେ କହୁଛନ୍ତି ତୁମର ଯୁକ୍ତ ୩ରେ ଶିକ୍ଷା ବିଭାଗର ଛାତ୍ର ହୋଇଥିବାରୁ ଭୂଗୋଳ ବିଭାଗରେ ନାମଲେଖା ପାଇଁ ଯେଉଁ ପାରାମିଟର ରହିଛି ତାହା ପୂରଣ କରୁନାହଁ । ତେଣୁ ତୁମର ନାମ କଟିଯାଇଛି। ଏନେଇ ପ୍ରଶ୍ନ କରିବା ପରେ କଲେଜ ପ୍ରିନ୍ସିପାଲ କହିଛନ୍ତି ତାହା ଆଡ଼ମିଶନ ନଥିଲା, ସାର୍ଟିଫିକେଟ ଭେରିଫିକେସନ ପରେ ମୋ ନାଁ କଟିଯାଇଛି ।"

ଏଠାରେ ପ୍ରଶ୍ନ ଉଠୁଛି କଲେଜ କର୍ତ୍ତୃପକ୍ଷ ଏତେ ବିଳମ୍ବରେ କାହିଁକି ତାଙ୍କୁ ଅବଗତ କରାଇଲେ ? ନାମଲେଖା ପ୍ରକ୍ରିୟା ଭିତରେ ଅଙ୍କି କୁ ସୂଚିତ କରିଥିଲେ ସେ ନାମଲେଖାର ଆବେଦନର ଦ୍ବିତୀୟ ପର୍ଯ୍ୟାୟ ପାଇଁ ଆବେଦନ କରିପାରିଥାନ୍ତେ, ତାହା ମଧ୍ୟ ହୋଇପାରିଲା ନାହିଁ । ଫଳରେ ସେ ଏବେ ନିଜର ଭବିଷ୍ୟତକୁ ନେଇ ଦ୍ବନ୍ଦ୍ବରେ ରହିଥିବା ବେଳେ ନାମଲେଖାରେ ସାମିଲ କରିବା ଲାଗି ସେ ଦାବି କରିଛନ୍ତି । ଏଥିଲାଗି ସେ କଲେଜ କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି ।

ଇଟିଭି ଭାରତ, ଭୁବନେଶ୍ବର