ଖୋର୍ଦ୍ଧା: ବେଗୁନିଆ ନିର୍ବାଚନ ମଣ୍ଡଳୀର ବୋଲଗଡ ବ୍ଲକ୍ ଅନ୍ତର୍ଗତ ବଡ଼ କୁମାରୀ ଗ୍ରାମପଞ୍ଚାୟତ ଅଧୀନ ବିଲ ଖଉରୁଣୀ ଗ୍ରାମର ଆର୍ତ୍ତତ୍ରାଣ ବେହେରାଙ୍କ ବଡ଼ପୁଅ ୪୨ ବର୍ଷୀୟ ଅକ୍ଷୟ କୁମାର ବେହେରାଙ୍କ ମୃତ ଶରୀରକୁ ଆଜି(ବୁଧବାର) ଓଡ଼ିଶା ମୋ ପରିବାର ଓ ଖୋର୍ଦ୍ଧା ଜିଲ୍ଲା ପ୍ରଶାସନ ଦ୍ଵାରା ସୁଦୂର ହାଇଦ୍ରାବାଦରୁ ତାଙ୍କ ନିଜ ଗ୍ରାମକୁ ଅଣାଯାଇଛି ।
ଏଠାରେ ସୂଚନାଯୋଗ୍ୟ ଯେ, ମୃତକ ଅକ୍ଷୟ ହାଇଦ୍ରାବାଦର ଏକ ହୋଟେଲରେ ଗତ ଦୁଇ ମାସ ହେବ ଚାକିରୀ କରିଥିଲେ । ଗତ ୫ ତାରିଖରେ ତାଙ୍କର ଦୁର୍ଘଟଣାରେ ମୃତ୍ୟୁ ହୋଇଥିଲା । ମୃତକଙ୍କ ପରିବାର ସ୍ଥାନୀୟ ସରପଞ୍ଚଙ୍କ ଜରିଆରେ ବିଧାୟକ ବେଗୁନିଆ ତଥା ଖୋର୍ଦ୍ଧା ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ରାଜେନ୍ଦ୍ର କୁମାର ସାହୁଙ୍କୁ ମୃତଦେହ ଆଣିବା ପାଇଁ ଅନୁରୋଧ କରିଥିଲେ ।
ବିଧାୟକ ରାଜେନ୍ଦ୍ର କୁମାର ସାହୁ ଓଡ଼ିଶା ମୋ ପରିବାରକୁ ଏ ବିଷୟରେ ଅବଗତ କରାଇବା ସହ ମୃତ ଶରୀରକୁ ଆଣିବା ସହ ଜିଲ୍ଲାପାଳଙ୍କୁ ରେଡକ୍ରସ ତରଫରୁ ସାହାଯ୍ୟ କରିବାକୁ ଅନୁରୋଧ କରିଥିଲେ । ଆଜି ଓଡ଼ିଶା ମୋ ପରିବାର ତରଫରୁ ମୃତକଙ୍କ ଧର୍ମପତ୍ନୀ ମିନତୀ ବେହେରାଙ୍କୁ ତିରିଶ ହଜାର ଟଙ୍କା ପ୍ରଦାନ କରିବା ସହ ମୃତ ଶରୀରକୁ ସୁଦୂର ହାଇଦ୍ରାବାଦରୁ ଆଣି ନିଜ ଜନ୍ମ ମାଟିରେ ଦାହ କରାଯାଇଛି ।
ଇଟିଭି ଭାରତ, ଖୋର୍ଦ୍ଧା
