ଖୋର୍ଦ୍ଧା: ବେଗୁନିଆ ଥାନା ଅଞ୍ଚଳରେ ମାତିଛନ୍ତି ଗୋ ମାଫିଆ । ଗ୍ରାମାଞ୍ଚଳରୁ ଗୋରୁଙ୍କୁ ସୁଦୂର କଲିକତା ଓ ବାଂଲାଦେଶ ଚାଲାଣ କରି ହେଉଛନ୍ତି ମାଲେମାଲ । ବିଶେଷକରି ବେଗୁନିଆ ଅଞ୍ଚଳରେ ଏହି ଗୋ ମାଫିଆ ମାନେ ବେଶ ସକ୍ରିୟ ହୋଇଉଠିଛନ୍ତି । ଆଜି ସନ୍ଧ୍ୟାରେ ଗୋ ଚାଲାଣକାରି ମାନେ ଏକ ପିକଅପ ଗାଡ଼ିରେ ଗୋ ଚାଲାଣ କରୁଥିବା ବେଗୁନିଆ ପୋଲିସ ଖବର ପାଇଥିଲା । ଟିକାତଳ ପ୍ରେଟ୍ରୋଲ ପମ୍ପ ନିକଟରେ ଚଢ଼ାଉ କରି ଗୋରୁ ବୋଝେଇ ପିକଅପକୁ ଜବତ କରି ୧୩ଟି ଗୋରୁଙ୍କୁ ଉଦ୍ଧାର କରି ଡ୍ରାଇଭର ଶେଖ ଲିଆକତଙ୍କୁ ଗିରଫ କରିଥିବା ବେଗୁନିଆ ଥାନା ଅଧିକାରୀ ଲକ୍ଷ୍ମୀପ୍ରସାଦ ଶତପଥୀ ସୂଚନା ଦେଇଛନ୍ତି ।
ସୂଚନା ମୁତାବକ ଏକ ଗୋରୁ ବୋଝେଇ ପିକଅପ୍ ୫୭ନଂ ଜାତୀୟ ରାଜପଥରେ ଭୁବନେଶ୍ୱର ଅଭିମୁଖେ ଯାଉଥିବା ବିଶ୍ୱସ୍ତ ସୂତ୍ରରୁ ଖବର ପାଇ ପୋଲିସ ଉକ୍ତ ଗାଡିକୁ ଟିକାତଳ ପ୍ରେଟ୍ରୋଲ ପମ୍ପ ନିକଟରେ ଅଟକାଇଥିଲା । ଏଥିରେ ୧୩ଟି ଗୋରୁଙ୍କୁ ଦୟନୀୟ ଭାବେ ବନ୍ଧାଯାଇ ନିଆଯାଉଥିବା ପୋଲିସ ଜାଣିବାକୁ ପାଇଥିଲା । ପୋଲିସ ଗାଡିକୁ ଜବତ କରିବା ସହିତ ସେଥିରେ ଥିବା ଗୋରୁଙ୍କୁ ପୋଲିସ ଉଦ୍ଧାର କରି ଭୁବନେଶ୍ବର ସିଜୁଆଠାରେ ଥିବା ଗୋଶାଳାରେ ଛାଡିଛି । ବେଆଇନ ଗୋଚାଲାଣ ଅଭିଯୋଗରେ ପୋଲିସ ଏକ ମାମଲା ରୁଜୁ କରି ପିକଅପ୍ ଡ୍ରାଇଭର ସେକ ଲିଆକତକୁ ଗିରଫ କରିଛି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
