Irasis Acharya Released: ଜେଲରୁ ମୁକୁଳିଲେ ବିଜେପି ଯୁବମୋର୍ଚ୍ଚା ସଭାପତି, ଲଢେଇ ତୀବ୍ର ହେବ କହିଲେ ଇରାଶିଷ

୫୫ ଦିନ ପରେ ଜେଲରୁ ମୁକୁଳିଲେ ବିଜେପି ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ । ଅଧିକ ପଢନ୍ତୁ

ଭୁବନେଶ୍ବର: ପ୍ରାୟ ଦୁଇ ମାସ ପରେ ଜେଲରୁ ମୁକୁଳିଲେ ବିଜେପି ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ । ଶନିବାର ଇରାଶିଷଙ୍କ ସମେତ ଯୁବମୋର୍ଚ୍ଚାର ୨୨ ଜଣ ସମର୍ଥକ ଭୁବନେଶ୍ବର ଝାରପଡା ଜେଲରୁ ବାହାରିଛନ୍ତି । ଯୁବ ମୋର୍ଚ୍ଚାର ନେତାମାନେ ଜେଲରୁ ମୁକୁଳିବା ପରେ ବିରାଟ ଶୋଭାଯାତ୍ରା କରି ପ୍ରଥମେ ରାମ ମନ୍ଦିର ଯାଇଥିଲେ । ସେଠାରୁ ଶୋଭାଯାତ୍ରାରେ ରାଜ୍ୟ ବିଜେପି କାର୍ଯ୍ୟାଳୟରେ ପହଞ୍ଚିଥିଲେ । ପାର୍ଟି ଅଫିସରେ ବିଜେପି ରାଜ୍ୟ ସଭାପତି ମନମୋହନ ସାମଲ ଓ ପୂର୍ବତନ ସଭାପତି ସମୀର ମହାନ୍ତି ଯୁବ ନେତାମାନଙ୍କୁ ମିଠା ଖୁଆଇ ଓ ଉତ୍ତରୀୟ ଦେଇ ସମ୍ବର୍ଦ୍ଧିତ କରିଥିଲେ ।

ଏହି ଅବସରରେ ଯୁବମୋର୍ଚ୍ଚା ସଭାପତି ଇରାଶିଷ କହିଛନ୍ତି, '' ଗଣତନ୍ତ୍ରରେ ମତବ୍ୟକ୍ତ କରିବାର ଏବଂ ଅନ୍ୟାୟକୁ ପ୍ରତିବାଦ କରିବାର ଅଧିକାର ସମସ୍ତଙ୍କର ଅଛି । ବିଜେଡି ବିରୋଧିଙ୍କ ସ୍ବର ଚାପିବାକୁ ଉଦ୍ୟମ କରୁଛି । ଷଡଯନ୍ତ୍ର କରି ମିଥ୍ୟା ମାମଲାରେ ଆମକୁ ଗିରଫ କରାଯାଇଛି । ବିଜେଡି ସରକାର ବିରୋଧରେ ଲଢେଇ ଆରମ୍ଭ ହୋଇଛି । ଏହି ଲଢେଇ ଜାରି ରହିବ । ଯୁବମୋର୍ଚ୍ଚାର ଆନ୍ଦୋଳନ ଆଗାମୀ ଦିନରେ ଆହୁରି ତୀବ୍ରତର ହେବ ।'' ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଯେ, ଏ ଜେଲର ଯାତ୍ରା ବିଜେଡିର ବିଦାୟ ଯାତ୍ରା । ବିଜେଡିର ଅଧ୍ୟାୟ ଶେଷ ହୋଇଯିବ ।

ଏଠାରେ ଉଲ୍ଲେଖଯୋଗ୍ୟ ଯେ, ମନ୍ତ୍ରୀ ନବ ଦାସ ହତ୍ୟା ଘଟଣାର ସିବିଆଇ ତଦନ୍ତ ଦାବି ଏବଂ ବିପର୍ଯ୍ୟସ୍ତ ଆଇନ ଶୃଙ୍ଖଳା ପ୍ରତିବାଦରେ ଗତ ଫେବୃୟାରୀ ୨୮ରେ ଲୋୟର ପିଏମଜିଠାରେ ବିଜେପି ଯୁବମୋର୍ଚ୍ଚା ବିକ୍ଷୋଭ ପ୍ରଦର୍ଶନ କରିଥିଲା । ଏହି ସମୟରେ ଯୁବମୋର୍ଚ୍ଚା କର୍ମୀ ଓ ପୋଲିସ ଭିତରେ ଧସ୍ତାଧସ୍ତି ହୋଇଥିଲା । ଏହି ଘଟଣାରେ ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟଙ୍କ ସମେତ ୨୨ ଜଣ ସମର୍ଥକଙ୍କୁ ଗିରଫ କରିଥିଲା ପୋଲିସ । ଦୀର୍ଘ ୫୫ ଦିନ ଧରି ଜେଲରେ ରହିବା ପରେ ଶନିବାର ଦିନ ସମସ୍ତେ ଝାରପଡା ଜେଲରୁ ବାହାରକୁ ବାହାରିଛନ୍ତି । ଜେଲରୁ ବାହାରିବା ପରେ ଶାସକ ବିଜୁ ଜନତା ଦଳ ଉପରେ ବର୍ଷିଛନ୍ତି ଇରାଶିଷ ଆଚାର୍ଯ୍ୟ ।

ଇଟିଭି ଭାରତ, ଭୁବନେଶ୍ବର