ଖୋର୍ଦ୍ଧା: ବ୍ରାଉନସୁଗାରର ପେଣ୍ଠସ୍ଥଳୀ ପାଲଟିଛି ଖୋର୍ଦ୍ଧା ଜିଲ୍ଲା । ଦିନକୁ ଦିନ ଏଠାରେ ବଢି ଚାଲିଛି ବେପାରୀ ଓ ଗ୍ରାହକଙ୍କ ସଂଖ୍ୟା । ବିଗତ ଦିନରେ ଖୋର୍ଦ୍ଧା ଅଞ୍ଚଳରୁ ବହୁପରିମାଣର ଧଳାଜହର ଜବତ ହୋଇଥିବାବେଳେ ଏହାକୁ ବେପାର କରୁଥିବା ବେପାରୀମାନେ ଗିରଫ ହୋଇଛନ୍ତି ।
ପୁଣିଥରେ ମଙ୍ଗଳବାର ଖୋର୍ଦ୍ଧାରୁ ଲକ୍ଷାଧିକ ଟଙ୍କାର ଧଳାଜହର ଜବତ କରିଛି କଟକ ଅବକାରୀ ବିଭାଗର ଫ୍ଲାଇଙ୍ଗ ସ୍କ୍ୱାର୍ଡ । ଏହି ଚଢ଼ାଉରେ ଖୋର୍ଦ୍ଧା ଅବକାରୀ ବିଭାଗ ସହଯୋଗ କରିଥିବା ସୂଚନା ମିଳିଛି ।
ଖବରମୂତାବକ, ପଲ୍ଲା ହାଟ ଛକରୁ ପତିତପାବନ ଭୁଜବଳଙ୍କ ଠାରୁ 65ଗ୍ରାମ ବ୍ରାଉନସୁଗାର ଜବତ କରିଛି ଅବକାରୀ ବିଭାଗ । ଯାହାର ଆନୁମାନିକ ମୂଲ୍ୟ 6 ଲକ୍ଷ 50ହଜାର ଟଙ୍କା ବୋଲି ଜଣାପଡିଛି । ଏଥିରେ ସଂପୃକ୍ତ ଥିବା ଜଣଙ୍କୁ ଗିରଫ କରାଯାଇଛି।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
