କେନ୍ଦୁଝର: କୂଅରୁ ଉଦ୍ଧାର ହେଲା ମହିଳାଙ୍କ ମୃତଦେହ । ଗତ 5 ଦିନ ହେବ ନିଖୋଜ ଥିବା ମହିଳାଙ୍କ ସୋମବାର ମୃତଦେହ ଉଦ୍ଧାର ହୋଇଛି ।
କେନ୍ଦୁଝର ଜିଲ୍ଲା ହରିଚନ୍ଦନପୁର ଥାନା ଅନ୍ତର୍ଗତ ଭଅଁରପୁର ଗ୍ରାମପଞ୍ଚାୟତ ଚଷାଟାଙ୍ଗିରି ଗ୍ରାମରେ ଘଟିଛି ଅଭାବନୀୟ ଘଟଣା । ଗ୍ରାମର ତ୍ରିଲୋଚନ ସାହୁଙ୍କ ପତ୍ନୀ ଶକୁନ୍ତଳା ସାହୁ ଗତ ୫ଦିନ ହେବ ନିଖୋଜ ଥିଲେ । ଯାହାକୁ ନେଇ ପରିବାର ଲୋକେ ଶକୁନ୍ତଳାଙ୍କୁ ଅନେକ ଖୋଜାଖୋଜି କରିବା ପରେ କିଛି ସନ୍ଧାନ ନପାଇନଥିଲେ ।
ଶେଷରେ ଉପାୟ ନପାଇ ହରିଚନ୍ଦନପୁର ଥାନାରେ ଏନେଇ ଏକ ଲିଖିତ ଅଭିଯୋଗ କରିଥିଲେ । ମାତ୍ର ସୋମବାର ସକାଳେ ଗାଁରେ ଥିବା ଏକ କୂଅରୁ ଶକୁନ୍ତଳାଙ୍କ ମୃତଦେହ ଭାସୁଥିବାର ଗ୍ରାମବାସୀ ଦେଖିବାକୁ ପାଇଥିଲେ ।
ଏହାପରେ ଗ୍ରାମବାସୀ ତାଙ୍କ ପରିବାର ଲୋକଙ୍କ ସମେତ ଏନେଇ ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ କେନ୍ଦୁଝର ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ଏଥିସହ ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛନ୍ତି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
