କେନ୍ଦୁଝର: ବିଭିନ୍ନ ଦାବି ନେଇ ଦୁବୁନାସ୍ଥିତ ଏକ ଘରୋଇ ଷ୍ଟିଲ୍ କମ୍ପାନୀ ବିରୁଦ୍ଧରେ ବଡ଼କାଳିମାଟି ପଞ୍ଚାୟତବାସୀଙ୍କ ଧାରଣା ଓ ଅନଶନ ଜାରି ରହିଛି । ଏହି ଧାରଣା ଓ ଅନଶନ ୩୨ ଦିନରେ ପହଞ୍ଚିଛି । ଆଜି ଚମ୍ପୁଆ ଉପଜିଲ୍ଲାପାଳଙ୍କ କାର୍ଯ୍ୟାଳୟର ୫ଶହ ମିଟର ଦୂରତା ମଧ୍ୟରେ ୧୪୪ ଧାରା ଜାରି କରାଯିବା ସହ ଅନଶନରେ ବସିଥିବା ଆନ୍ଦୋଳନକାରୀଙ୍କୁ ତଡ଼ି ଦିଆଯାଇଛି । ଲୋକମାନେ ଉପଜିଲ୍ଲାପାଳଙ୍କ କାର୍ଯ୍ୟାଳୟଠାରୁ ଦୂରରେ ଥାଇ ମଧ୍ୟ ଆନ୍ଦୋଳନକୁ ଜାରି ରଖିଛନ୍ତି ।
ପୂର୍ବରୁ ଉକ୍ତ କମ୍ପାନୀ କର୍ତ୍ତୃପକ୍ଷ ସ୍ଥାନୀୟ ଲୋକମାନଙ୍କୁ ସ୍ବାସ୍ଥ୍ୟ, ଶିକ୍ଷା, ପାନୀୟ ଜଳ, ବିଦ୍ୟୁତ୍ ଓ ଗମନାଗମନର ସୁବିଧା କରାଯିବା ସହ ବେକାରୀମାନଙ୍କୁ କର୍ମ ନିଯୁକ୍ତି ଯୋଗାଇ ଦେବାକୁ ପ୍ରତିଶ୍ରୁତି ଦେଇଥିଲେ । ହେଲେ ତାହା ଏ ପର୍ଯ୍ୟନ୍ତ ପୂରଣ ହୋଇପାରିନାହିଁ । ସେଥିପାଇଁ ପଞ୍ଚାୟତବାସୀମାନେ ଦୀର୍ଘଦିନ ଧରି ଆନ୍ଦୋଳନ କରିଆସୁଛନ୍ତି । ଯେ ପର୍ଯ୍ୟନ୍ତ ଦାବି ପୂରଣ ନ ହୋଇଛି ସେ ପର୍ଯ୍ୟନ୍ତ ଆମରଣ ଅନଶନ ଜାରି ରହିବ ବୋଲି ସେମାନେ ଚେତାବନୀ ଦେଇଛନ୍ତି । ପ୍ରଶାସନିକ ଉଦାସୀନତା କାରଣରୁ ବାରମ୍ବାର ଦାବି ଜଣାଇବା ସତ୍ତ୍ବେ ସେମାନଙ୍କ କଥା କେହି ଶୁଣୁ ନ ଥିବା ବଡ଼କାଳିମାଟି ଡେଭଲପ୍ମେଣ୍ଟ ସୋସାଇଟି ଅଭିଯୋଗ କରିଛି ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
