କେନ୍ଦୁଝର : ହୋଲିରେ ଅଘଟଣ । ପୋଖରୀରେ ବୁଡି ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । କେନ୍ଦୁଝର ଟାଉନ ଥାନା ହରିଡାଗୋଠ ଠାରେ ଘଟିଛି ଏ ଅଘଟଣ । ମୃତ ବ୍ୟକ୍ତି ଜଣକ ହେଲେ ଶତ୍ରୁଘନ ବେହେରା ।
ହୋଲିରେ ଅଘଟଣ, ପୋଖରୀରେ ବୁଡି ଜଣଙ୍କର ମୃତ୍ୟୁ
ସୂଚନା ଅନୁସାରେ, ଶତ୍ରୁଘନ ଆଜି (ଶନିବାର) ହୋଲି ଖେଳି ସାରିବା ପରେ ଗାଧୋଇବାକୁ ପୋଖରୀକୁ ଯାଇଥିଲେ । ହେଲେ ଗୋଡ଼ ଖସିଯିବାରୁ ସେ ପୋଖରୀରେ ବୁଡି ଯାଇଥିଲେ । ଗାଁ ଲୋକ ତାଙ୍କୁ ଉଦ୍ଧାର କରି ୧୦୮କୁ ଯୋଗାଯୋଗ କରିଥିଲେ ମଧ୍ୟ ମେଡିକାଲ ଠାରୁ ୭ କିଲୋମିଟର ଦୂରରେ ଥିବା ହରିଡାଗୋଠ ଗାଁକୁ ପହଞ୍ଚି ନଥିଲା ଆମ୍ବୁଲାନ୍ସ ।
ବାଧ୍ୟ ହୋଇ ଅଟୋରେ ଗୁରୁତର ବ୍ୟକ୍ତିଙ୍କୁ ଅଣାଯାଉଥିବାବେଳେ ସହରର ମଣ୍ଡୁଆ ଠାରେ ଅଟୋରେ ତେଲ ସରିଯିବାରୁ ଏକ ବାଇକରେ ଶତ୍ରୁଘନଙ୍କୁ କେନ୍ଦୁଝର ମେଡିକାଲକୁ ଅଣାଯାଇଥିଲା । ଡାକ୍ତର ତାଙ୍କୁ ଦେଖିବା ପରେ ମୃତ ଘୋଷଣା କରିଥିଲେ । ସେପଟେ ମୃତଦେହକୁ ପୋଷ୍ଟ ମର୍ଟମ କରିବାରେ ବିଳମ୍ବ ହେବାରୁ ପରିବାର ଲୋକେ ଅସନ୍ତୋଷ ବ୍ୟକ୍ତ କରିଥିଲେ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
