କେନ୍ଦୁଝର: ଆରମ୍ଭ ହେଲା ଗୋନାସିକା କେନ୍ଦୁଝର ମହୋତ୍ସବ ୨୦୧୯ । କେନ୍ଦୁଝର ସଦର ମହକୁମାଠାରେ ଜିଲ୍ଲା ପ୍ରଶାସନ ଓ ପଞ୍ଚାୟତରାଜ ବିଭାଗର ମିଳିତ ଆନୁକୂଲ୍ୟରେ ଆୟୋଜିତ ହେଉଥିବା ଗୋନାସିକା କେନ୍ଦୁଝର ମହୋତ୍ସବ ଓ ଜାତୀୟସ୍ତରୀୟ ପଲ୍ଲୀଶ୍ରୀ ମେଳା ସ୍ଥାନୀୟ କାଳୀପଡିଆ ଠାରେ ଗତ ଶୁକ୍ରବାର ସନ୍ଧ୍ୟାରେ ଉଦଘାଟିତ ହୋଇଛି ।
ଏହି ଉଦଯାପନୀ ମହୋତ୍ସବରେ ମୁଖ୍ୟ ଅତିଥି ଭାବେ ରାଜ୍ୟ ଖଣି ଇସ୍ପାତ ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ ମଲ୍ଲିକ ଯୋଗ ଦେଇଥିଲେ । ତେବେ ଏହି ମେଳା ୭ଦିନ ଧରି ଚାଲିବ ।
ଜାତୀୟସ୍ତରୀୟ ପଲ୍ଲିଶ୍ରୀ ମେଳାରେ ୨୦ରୁ ଅଧିକ ରାଜ୍ୟରୁ ବ୍ୟବସାୟୀମାନେ ଯୋଗ ଦେଇଛନ୍ତି । ଏଣୁ ଏମାନଙ୍କ ନିମନ୍ତେ ୨୩୬ଟି ଷ୍ଟଲ ତିଆରି କରାଯାଇଛି । ଜିଲ୍ଲାପାଳ ଆଶିଷ ଠାକରେଙ୍କ ଅଧ୍ୟକ୍ଷତାରେ ଆୟୋଜିତ ଏହି ଉଦ୍ଘାଟନୀ ଉତ୍ସବରେ ଅନ୍ୟତମ ଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷା, ପାଟଣା , ଆନନ୍ଦପୁର , ଘଷିପୁରା ବିଧାୟକଙ୍କ ସହ ସାଂସଦ ଓ ଜିଲ୍ଲାର ମନ୍ତ୍ରୀ ପ୍ରେମାନନ୍ଦ ନାୟକ ଯୋଗ ଦେଇଥିଲେ ।
ଉଦ୍ଘାଟନୀ ଉତ୍ସବରେ ବିଭିନ୍ନ ରାଜ୍ୟ ଓ ଜିଲ୍ଲାରୁ ଆସିଥିବା ସାଂସ୍କୃତିକ ଦଳ କାର୍ଯ୍ୟକ୍ରମ ପରିବେଷଣ କରିଥିଲେ । ଏହି ଉତ୍ସବରେ ଜିଲ୍ଲାର ବିଭିନ୍ନ ସ୍ଥାନରୁ ବହୁ ସଂଖ୍ୟାରେ ଦର୍ଶକ ଏହି ମହୋତ୍ସଵକୁ ଦେଖିବା ପାଇଁ ଭିଡ ପରିଲକ୍ଷିତ ହୋଇଥିଲା ।
ମୁଖ୍ୟ ଅତିଥି ଶ୍ରୀ ମଲ୍ଲିକ ନିଜ ବକ୍ତବ୍ୟରେ ଜିଲ୍ଲାର ଲୁକ୍କାୟିତ କଳା, ସାହିତ୍ୟ, ସଂସ୍କୃତିର ଦର୍ପଣ ବୋଲି ପ୍ରକାଶ କରିବା ସହ ଏହା ଅନ୍ୟ ଜିଲ୍ଲା ଅପେକ୍ଷା ଅତି ସୁନ୍ଦର ଓ ଭିନ୍ନ ବୋଲି କହିଥିଲେ । ଜିଲ୍ଲାର ବିଭିନ୍ନ ସ୍ବୟଂ ସହାୟକ ଗୋଷ୍ଠୀ ଏହି ମହୋତ୍ସବ ମାଧ୍ୟମରେ ସେମାନଙ୍କର ଉତ୍ପାଦିତ ସାମଗ୍ରୀର ବ୍ୟବସାୟ କରିବା ପାଇଁ ବିଶେଷ ସୁଯୋଗ ପାଇଥାନ୍ତି ବୋଲି ସେ ଅଭିହିତ କରିଥିଲେ ।
କେନ୍ଦୁଝରରୁ ସନ୍ତୋଷ ମହାପାତ୍ର, ଇଟିଭି ଭାରତ
