କେନ୍ଦୁଝର: କେନ୍ଦୁଝର ଜିଲ୍ଲା ଟାଉନ ଥାନା ରାଜପଥ ୨୦ ବାଇପାସ ଓଭରବ୍ରିଜ ତଳୁ ଜଣେ ମହିଳାଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର ହୋଇଛି । ଆଜି(ମଙ୍ଗଳବାର) ଜଣେ ସଂଦିଗ୍ଧ ବ୍ୟକ୍ତି ଓଭରବ୍ରିଜ ଦେଇ ଏକ ଲୁନା ମୋପେଡରେ ଏକ ବସ୍ତା ଧରି ଯାଉଥିଲେ। ଏନେଇ ସ୍ଥାନୀୟ ଲୋକଙ୍କୁ ସନ୍ଦେହ ହେବାରୁ କିଛି ଲୋକ ତାଙ୍କୁ ଅଟକାଇବାକୁ ଚେଷ୍ଟା କରିଥିଲେ। ତେବେ ଧରା ପଡ଼ିଯିବା ଭୟରେ ବ୍ୟକ୍ତି ଜଣକ ନିଜର ଗାଡ଼ି ସହ ବସ୍ତା ଛାଡ଼ି କେଉଁଆଡ଼େ ଫେରାର ହୋଇ ଯାଇଛି।
ଘଟଣାକୁ ନେଇ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ। ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ବସ୍ତାଟିକୁ ଖୋଲିଥିଲେ। ତେବେ ବସ୍ତା ଖୋଲି ଦେଖିବା ବେଳକୁ ସମସ୍ତେ ଚକିତ ହୋଇଯାଇଥିଲେ। ବସ୍ତାରେ ଜଣେ ମହିଳାଙ୍କ ଖଣ୍ଡ ବିଖଣ୍ଡିତ ଶରୀର ଉଦ୍ଧାର କରିଥିଲା ପୋଲିସ। ବସ୍ତା ନେଇ ଯାଉଥିବା ବ୍ୟକ୍ତିଙ୍କୁ ଖୋଜ ଚଳାଇଛି ପୋଲିସ।
ମହିଳା ଜଣକ କିଏ ତାଙ୍କର କୌଣସି ପରିଚୟ ମିଳି ପାରିନାହିଁ। ତେବେ ପୋଲିସ ପହଞ୍ଚିବା ପୂର୍ବରୁ କେହି ଜଣେ ସେଠାରେ ପଡ଼ିଥିବା ମୋପେଟକୁ ମଧ୍ୟ ନେଇଯାଇଥିବା ସୂଚନା ମିଳିଛି। ଘଟଣାକୁ ନେଇ ପୋଲିସ ଏକ ମାମଲା ରୁଜୁ କରିଛି। ଘଟଣାର ତଦନ୍ତ ପରେ ସମସ୍ତ ତଥ୍ୟ ପଦାକୁ ଆସିବା ନେଇ ପୋଲିସ ସୂଚନା ଦେଇଛି।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
