ଆନନ୍ଦପୁର: ସାରା ରାଜ୍ୟରେ ଲାଗି ରହିଛି ମୂଷଳଧାରାରେ ବର୍ଷା । ଏଥିଯୋଗୁଁ ଅନେକ ଅଞ୍ଚଳରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ତେବେ ଆନନ୍ଦପୁର ଫାପୁଡିଆ ପୋଲ ବର୍ଷା ପାଣିରେ ଧୋଇଯାଇଛି। ଫଳରେ ସରେଇଁ ଏବଂ ଜାତୀୟ ରାଜପଥ ୨୦କୁ ସଂଯୋଗ କରୁଥିବା ରାସ୍ତା ବନ୍ଦ ହୋଇଯାଇଛି।
ଲୋକେ ନାହିଁ ନଥିବା ଅସୁବିଧାର ସାମନା କରିଛନ୍ତି । ଏହି ପୋଲ ଦେଇ ପ୍ରତିଦିନ ସ୍କୁଲ, କଲେଜ ଛାତ୍ରଛାତ୍ରୀଙ୍କ ସହ ଅନେକ ଲୋକ ଯାତାୟତ କରିଥାନ୍ତି । ସେମାନଙ୍କ ପାଇଁ ବଡ ସମସ୍ୟା ତିଆରି କରିଛି ଏହି ବର୍ଷା । କିଛି ବର୍ଷ ହେବ ବିପଦପୂର୍ଣ୍ଣ ଅବସ୍ଥାରେ ରହିଥିଲା ଏହି ପୋଲ। ଏନେଇ ସ୍ଥାନୀୟ ଲୋକେ ବିଭାଗୀୟ ଅଧିକାରୀଙ୍କୁ ଅଭିଯୋଗ କରିଥିଲେ। ଫଳରେ ଗତବର୍ଷ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ପାଖାପାଖି ୨ ଲକ୍ଷ ଟଙ୍କା ବ୍ୟୟରେ ମରାମତି କାର୍ଯ୍ୟ କରାଯାଇଥିଲା ।
ହେଲେ ଦୁଇ ଦିନ ହେବ ଲଗାତର ବର୍ଷା ଫଳରେ ଗତରାତିରେ ପୋଲଟି ଭାଙ୍ଗିଯାଇଛି । ତୁରନ୍ତ ପୋଲ ନିର୍ମାଣ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
ଆନନ୍ଦପୁର ସ୍ମୃତି ରଞ୍ଜନ ବିହାରୀ,ଇଟିଭି ଭାରତ
