କେନ୍ଦୁଝର : ସରକାର ପରେ ସରକାର ବଦଳିଛି । ବିଭିନ୍ନ ସରକାର ନିର୍ବାଚନ ସମୟରେ ପ୍ରତିଶ୍ରୁତି ପରେ ପ୍ରତିଶ୍ରୁତି ଦେଇ ଚାଲିଛନ୍ତି । କିନ୍ତୁ ନିର୍ବାଚନ ସରିଲେ କାହାର ଦେଖା ନାହିଁ । ସ୍ବାଧୀନତାର ୭୫ ବର୍ଷ ପରେ ମଧ୍ୟ ଗାଁକୁ ରାସ୍ତା ନାହିଁ ତ ଜମିକୁ ପାଣି ନାହିଁ । ଆଉ ସରକାରଙ୍କ ମିଛ ପ୍ରତିଶ୍ରୁତିର ଶିକାର ହୋଇଛଚନ୍ତି ଗ୍ରାମବାସୀ । ଏଭଳି ଅଭିଯୋଗ କରିଛନ୍ତି କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ତିନୋଟି ପଞ୍ଚାୟତର ଲୋକେ । ହରିଚନ୍ଦନପୁର ବ୍ଲକ ତେନ୍ତଲାପଶି, ହୁଣ୍ଡା ଓ ଜୁଙ୍ଗା ତିନୋଟି ପାହାଡ ଜଙ୍ଗଲ ଭରା ଆଦିବାସୀ ବହୁଳ ପଞ୍ଚାୟତ ଭାବେ ଜଣାଶୁଣା । ଏହି ତିନୋଟି ପଞ୍ଚାୟତରେ ୧୨ଟି ଗ୍ରାମର ଲୋକେ ଚାଷବାସ ଉପରେ ନିର୍ଭର କରୁଥିବା ବେଳେ ବର୍ଷା ଜଳହିଁ ଏକମାତ୍ର ଭରସା । ଏହି ତିନୋଟି ପଞ୍ଚାୟତ ଦେଇ ଖଡ଼ିଆଡିହା ନାଳ ଯାଉଛି । ଏହି ନାଳର ପାଣି ଉପରେ ତିନୋଟି ପଞ୍ଚାୟତର ଚାଷୀ ନିର୍ଭର କରନ୍ତି । ଏହି ନାଳ ଉପରେ ବଡକାଇଁଝରି କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ପାଇଁ ଏହି ତିନୋଟି ପଞ୍ଚାୟତର ଲୋକେ ଦୀର୍ଘଦିନ ହେବ ଦାବି କରି ଆସୁଛନ୍ତି ।
ଏହା ମଧ୍ୟ ପଢନ୍ତୁ... MSCBର ଦ୍ବିତୀୟ କ୍ୟାମ୍ପସ ନିଷ୍ପତ୍ତି, ଧରଣୀଧର ବିଶ୍ବବିଦ୍ୟାଳୟକୁ ହେବ ହସ୍ତାନ୍ତର
କିନ୍ତୁ ସରକାର କି ପ୍ରଶାସନ କେହି କର୍ଣ୍ଣପାତ କରୁ ନଥିବା ଅଭିଯୋଗ କରିଛନ୍ତି । ୩ଟି ପଞ୍ଚାୟତର ୧୨ ଟି ଗ୍ରାମବାସୀ ୧୯୬୭ ମସିହାରୁ କ୍ଷୁଦ୍ର ଜଳସେଚନ ପ୍ରକଳ୍ପ ନିର୍ମାଣ ପାଇଁ ଦାବି ହେଇ ଆସୁଥିବା ବେଳେ ୧୯୯୭ ମସିହାରେ ଆନନ୍ଦପୁର ଡିଭିଜନ ଅଧୀନରେ ଏକ ପ୍ରକଳ୍ପ ପାଇଁ ବ୍ୟୟ ମଞ୍ଜୁର ହୋଇଥିଲା । କିନ୍ତୁ ଏହା ନିର୍ମାଣ ହୋଇ ପାରିନଥିବାରୁ ପଞ୍ଚାୟତବାସୀ ୧୯୯୮ ଓ ୨୦୦୦ ମସିହାରେ ନିର୍ବାଚନ ବହିସ୍କାର କରିଥିଲେ । କିନ୍ତୁ ପ୍ରଶାସନର ପ୍ରତିଶୃତି ପରେ ଗ୍ରାମବାସୀ ପରବର୍ତ୍ତୀ ସମୟରେ ନିର୍ବାଚନରେ ସାମିଲ ହୋଇଥିଲେ। କିନ୍ତୁ ଏହି ପ୍ରକଳ୍ପ ନିର୍ମାଣ ପରବର୍ତ୍ତୀ ହେଇ ପାରିନଥିବାରୁ ଆଜି ତିନୋଟି ପଞ୍ଚାୟତର ଲୋକେ ଜିଲ୍ଲାପାଳଙ୍କ କାର୍ଯ୍ୟାଳୟର ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ପାଣି ନାହିଁ ତ ଭୋଟ ନାହିଁ ସ୍ଲୋଗାନ ଦେଇ ଶତାଧିକ ଗ୍ରାମବାସୀ ସହର ପରିକ୍ରମା କରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିଥିଲେ । ଏନେଇ ଏକ ଦାବିପତ୍ର ମଧ୍ୟ ଜିଲ୍ଲାପାଳଙ୍କୁ ପ୍ରଦାନ କରିଥିଲେ । ଏହି ଦାବି ନମାନିଲେ ଆଗାମୀ ୨୦୨୪ ସାଧାରଣ ନିର୍ବାଚନର ଏହାର ପ୍ରତିକ୍ରିୟା ଦେଖିବାକୁ ମିଳିବ ବୋଲି ବିକ୍ଷୋଭକାରୀ ଚେତାବନୀ ଦେଇଛନ୍ତି ।
ଇଟିଭି ଭାରତ, କେନ୍ଦୁଝର
