କେନ୍ଦୁଝର: ଜିଲ୍ଲାସ୍ଥିତ ସଦର ଥାନା ଅନ୍ତର୍ଗତ ଶୁଆକାଠି ଠାରେ ଦୁର୍ଘଟଣା । ଏକ 10 ଚକିଆ ଟ୍ରକ ରାସ୍ତାକଡରେ ଥିବା ଦୋକାନ ଘରେ ପଶିଯିବାରୁ 2 ଜଣଙ୍କ ମୃତ୍ୟୁ ଘଟିଛି । ଏଥିସହ ଜଣେ ଗୁରୁତର ଆହତ ହୋଇଛନ୍ତି, ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସୂଚନା ଅନୁଯାୟୀ ଏକ 10 ଚକିଆ ଟ୍ରକ ଆଇରନ ଲୋଡ଼ କରିବା ପାଇଁ ଶୁଆକାଠିସ୍ଥିତ ଓଏମସି ଖଣିକୁ ଯାଉଥିଲା । ଏହି ସମୟରେ ମନ୍ଦିର ନିକଟରେ ଥିବା ଏକ ଦୋକାନ ଘରେ ଟ୍ରକଟି ଭାରସାମ୍ୟ ହରାଇ ପଶି ଯାଇଥିଲା । ଫଳରେ ଘଟଣାସ୍ଥଳରେ 2 ଜଣଙ୍କ ମୃତ୍ୟୁ ଘଟି ଥିବାବେଳେ ଜଣେ ଗୁରୁତର ଆହତ ହୋଇଛନ୍ତି । ତେବେ ମୃତକ ଦ୍ବୟ ଦୋକାନ ମାଲିକ ଓ ଟ୍ରକ ହେଲପର, ଟ୍ରକ ଡ୍ରାଇଭର ଗୁରୁତର ଆହତ ହୋଇଥିବା ଜଣାପଡିଛି । ତାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଦୁର୍ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେବା ପରେ ପୋଲିସ ଘଟଣାସ୍ଥଳରେ ପହଞ୍ଚି ବୁଝାସୁଝା କରି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
