କେନ୍ଦୁଝର: ସଦର ବିଧାୟକ ତଥା ବିରୋଧୀ ଦଳର ମୁଖ୍ୟ ସଚେତକ ମୋହନ ଚରଣ ମାଝିଙ୍କ ବିରୋଧରେ ଠକେଇ ଅଭିଯୋଗ ଆସିଛି। ଏପରି ଅଭିଯୋଗ ଆଣିଛନ୍ତି କେନ୍ଦୁଝର ସହରର ଜଣେ ପ୍ରତିଷ୍ଠିତ ଫର୍ଣ୍ଣିଚର ବ୍ୟବସାୟୀ । ବ୍ୟବସାୟୀ ଜଣକ ବିଜେପିର ପୂର୍ବତନ ଜିଲ୍ଲା ସାଧାରଣ ସମ୍ପାଦକ ସଞ୍ଜୀବ ନାୟକ ।
ସୂଚନା ଅନୁସାରେ, ୨୦୧୯ରେ ସଞ୍ଜୀବଙ୍କ ଠାରୁ ମୋହନ ମାଝୀ ୩ ଲକ୍ଷ ୫୬ ହଜାର ଟଙ୍କାର ଆସବାବପତ୍ର ଓ କିଛି ନଗଦ ଟଙ୍କା ନେଇଥିଲେ । ତେବେ ଦୀର୍ଘ ୨ ବର୍ଷରୁ ଉର୍ଦ୍ଧ୍ବ ହେଲେ ସୁଦ୍ଧା ବର୍ତ୍ତମାନ ଯାଏ ୧ ଲକ୍ଷ ୫୫ ହଜାର ଟଙ୍କା ବକେୟା ରହିଛି । ଟଙ୍କା ମାଗିଲେ ବ୍ୟବସାୟୀଙ୍କୁ ଧମକ ଦେଉଛନ୍ତି ବିଧାୟକ ।
ଏହାବି ପଢନ୍ତୁ : ଦେଶର ୨୫ ହଜାର ଗାଁରେ ନାହିଁ ମୋବାଇଲ ନେଟଓ୍ବର୍କ, ଆଗରେ ଓଡିଶା
ଏନେଇ ଥାନାରେ ଏତଲା ଦେଇଛନ୍ତି ବ୍ୟବସାୟୀ । ବିଧାୟକଙ୍କୁ ଫୋନ ଯୋଗେ ଯୋଗାଯୋଗ କରିବାରୁ ସଞ୍ଜୀବ ନାଏକ ନିମ୍ନମାନର ଫର୍ଣ୍ଣିଚର ଦେଇଥିବା ବେଳେ ହିସାବ ମୁତାବକ ସମସ୍ତ ଟଙ୍କା ନେଇ ସାରିଥିବା ସଦର ବିଧାୟକ ପ୍ରକାଶ କରିଛନ୍ତି । ଏହାସହ ସମ୍ପୃକ୍ତ ବ୍ୟବସାୟୀଙ୍କ ନାଁରେ ମାନହାନୀ ମକଦ୍ଦମା କରିବେ ବୋଲି ବିଧାୟକ ଫୋନ ଯୋଗେ ଧମକ ଦେଇଥିବା ଅଭିଯୋଗ ହୋଇଛି । ସେପଟେ ତଦନ୍ତ ପରେ ପଦକ୍ଷେପ ନିଆଯିବ ବୋଲି ଟାଉନ ଥାନା ଆଇଆଇସି କହିଛନ୍ତି ।
କେନ୍ଦୁଝରରୁ ସନ୍ତୋଷ କୁମାର ମହାପାତ୍ର, ଇଟିଭି ଭାରତ
