କେନ୍ଦ୍ରାପଡ଼ା: ଦିନକୁ ଦିନ ବଢିବାରେ ଲାଗିଛି ଦୁର୍ଘଟଣା । ସରକାର ଗାଡି ଚଲାଇବା ସମୟରେ ବିଭିନ୍ନ ସତର୍କତା ଅବଲମ୍ବନ କରିବାକୁ ସଚେତନତା ସୃଷ୍ଟି କରିବା ସତ୍ତ୍ବେ ମଧ୍ୟ ଥମିବାର ନା ନେଉନି ଦୁର୍ଘଟଣା । ପୁଣି କେନ୍ଦ୍ରାପଡା ମହିପାଳ ନିକଟରେ ଏକ ଅଜଣା ଗାଡି ଧକ୍କାରେ ଜଣେ ବାଇକ ଆରୋହୀଙ୍କ ମୃତ୍ୟୁ ହୋଇଛି ।
ସୂଚନାନୁଯାୟୀ, ସଦର ଥାନା ଅଧିନ ଗହଗା ନରସିଂହପୁର ଗ୍ରାମର ଅକ୍ଷୟ ପଣ୍ଡା ବୁଧବାର ନିଜ ବାଇକ ଯୋଗେ କେନ୍ଦ୍ରାପଡ଼ା ଆସୁଥିବା ବେଳେ ସହରର ଜନଗହଳିପୂର୍ଣ୍ଣ ସ୍ଥାନ ମହିପାଳ ବିଏସଏନଏଲ ଅଫିସ ସମ୍ମୁଖରେ ତାଙ୍କୁ ଏକ ଅଜଣା ଗାଡି ଧକ୍କା ଦେଇ ଚାଲିଯାଇଥିଲା । ଗୁରୁତର ଅବସ୍ଥାରେ ଅକ୍ଷୟଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି ।
ଅକ୍ଷୟ ଜଣେ ପୋଷ୍ଟମାଷ୍ଟର ଭାବରେ ନିଜ ଗାଁ ଗହଗା ନରସିଂହପୁର ପୋଷ୍ଟ ଅଫିସରେ କାର୍ଯ୍ୟରତ ଥିଲେ । ଏନେଇ ଟାଉନ ଥାନାରେ ଏକ ମାମଲା ରୁଜୁ କରାଯାଇ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
