କେନ୍ଦ୍ରାପଡ଼ା: ରାତି ପାହିଲେ ଭୋଟ ଗଣତି । ସନ୍ଧ୍ୟା ଯାଏଁ ଛାତି ଭିତରେ ରହିବ ଡର ଆଉ ଶଙ୍କା । କିଏ ହେବ ବାଜିଗର, କିଏ ଚାଖିବ ପରାଜୟର ସ୍ବାଦ । ସେସବୁ ଉପରୁ ଉଠିବ ପରଦା । ଗଣତି ପରେ ଚିତ୍ର ସ୍ପଷ୍ଟ ହେବ । ଏଭଳି ସମୟରେ ସାରା ରାଜ୍ୟର ନଜର ରହିଛି କେନ୍ଦ୍ରାପଡା ଲୋକସଭା ଆସନ । ଗୋଟିଏ ଆସନରେ ଦୁଇଟି ଦଳର ମାନସମ୍ମାନ, ପତିଆରା ବାଜିରେ ଲାଗିଛି ।
ଫଳାଫଳର ଗୋଟିଏ ଦିନ ପୂର୍ବରୁ କେନ୍ଦ୍ରାପଡା ଅନୁଭବ ମହାନ୍ତି ବିଜୟ ମୁକୁଟ ପିନ୍ଧିବେ ବୋଲି ଆଶାବାଦୀ ଅଛନ୍ତି ମହାକାଳପଡ଼ାର ବିଜେଡି ବିଧାୟକ ପ୍ରାର୍ଥୀ ଅତନୁ ସବ୍ୟସାଚୀ ନାୟକ । ଅନ୍ୟପଟେ ଗଣତିକୁ ନେଇ ଜିଲ୍ଲାରେ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଗଣନା କେନ୍ଦ୍ରରେ ତ୍ରି-ସ୍ତରୀୟ ସୁରକ୍ଷା ବ୍ୟବସ୍ଥା ରହିଛି । ମୋଟ ଆଠ ପ୍ଲାଟୁନ ପୋଲିସ ଫୋର୍ସ ସହ ଏକ କମ୍ପାନୀ ବିଏସଏଫ ଯବାନଙ୍କୁ ମୁତୟନ କରଯାଇଛି । ସେହିଭଳି ଶୃଙ୍ଖଳିତ ଭାବରେ ଏହି ମତଗଣନା କରାଯିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଆବଶ୍ୟକୀୟ ବ୍ୟବସ୍ଥା କରାଯାଇଥିବା ସୂଚନା ଦେଇଛନ୍ତି ଜିଲ୍ଲାପାଳ ପ୍ରେମଚନ୍ଦ୍ର ଚୌଧୁରୀ ।
ସେହିପରି ସମସ୍ତ ଗଣତି କେନ୍ଦ୍ରରେ ୧୪ଟି ଲେଖାଏଁ ଟେବୁଲର ବ୍ୟବସ୍ଥା ରହିଥିବା ବେଳେ ୪୫୦ଜଣ ଭୋଟ ଗଣନାକାରୀଙ୍କ ଦ୍ୱାରା ଭୋଟ ଗଣନା କରାଯିବାର ବ୍ୟବସ୍ଥା ମଧ୍ୟ ରହିଛି । ତୁଳସୀକ୍ଷେତ୍ର କେନ୍ଦ୍ରାପଡା କାହା ହାତ ମୁଠାକୁ ଆସିବ, ସେ ସମୀକରଣର ସମାଧାନ ମଧ୍ୟ କାଲି ହୋଇଯିବ । ଏବେ କାଲିର ଗଣତିକୁ ଅପେକ୍ଷା, ଆଉ ଫଳାଫଳ ପାଇଁ ପ୍ରତୀକ୍ଷା ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
