କେନ୍ଦ୍ରାପଡା: ବିଳମ୍ବିତ ରାତିରେ ମର୍ମନ୍ତୁଦ ସଡକ ଦୁର୍ଘଟଣା । ଯାତ୍ରୀବାହୀ ଅଟୋ ଉପରେ ଏକ ଅଜଣା ଗାଡି ମାଡିଯିବାରୁ ୩ଜଣଙ୍କର ମୃତ୍ୟୁ ହୋଇଛି । କେନ୍ଦ୍ରାପଡା ଥାନା ଅଧିନ ବଳଭଦ୍ରପୁର ନିକଟରେ ଏହି ଦୁର୍ଘଟଣା ଘଟିଥିବା ସୂଚନା ମିଳିଛି । ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଦୁଇ ମୃତକଙ୍କ ପରିଚୟ ମିଳିଥିବା ବେଳେ ଜଣେ ମୃତକଙ୍କ ପରିଚୟ ମିଳିପାରି ନାହିଁ ।
ମିଳିଥିବା ସୂଚନା ଅନୁଯାୟୀ, ଗୁରୁବାର ବିଳମ୍ବିତ ରାତିରେ ଏକ ଯାତ୍ରୀବାହୀ ଅଟୋ ଯାଉଥିବା ବେଳେ ବଳଭଦ୍ରପୁର ଗ୍ରାମ ନିକଟରେ ଦୁର୍ଘଟଣାର ଶିକାର ହୋଇଥିଲା । ଅଟୋ ଉପରେ ଏକ ଅଜଣା ଗାଡି ମାଡିଯିବାରୁ ସେଥିରେ ଥିବା 3ଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା । ଦୁର୍ଘଟଣା ପରେ ଅଟୋଟି ଭଙ୍ଗାରୁଜା ଅବସ୍ଥାରେ ପଡିରହିଥିବା ବେଳେ ଘଟଣାସ୍ଥଳରେ ସଦର ପୋଲିସ ପହଞ୍ଚି କେଉଁ ପରିସ୍ଥିତିରେ ଦୁର୍ଘଟଣା ଘଟିଲା ସେନେଇ ତଦନ୍ତ ଆରମ୍ଭ କରିଛି ।
ଏହା ମଧ୍ୟ ପଢନ୍ତୁ-ଓଡ଼ିଶାରେ ପ୍ରତିଷ୍ଠା ହେବ ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର: ସ୍ୱାସ୍ଥ୍ୟ ସଚିବ
ତିନି ମୃତକ ହେଉଛନ୍ତି ଆଳି ଥାନା ଅନ୍ତର୍ଗତ ଜାମୁଦଣ୍ଡା ଗାଁର ଆଶିଷ ବେହୁରା,ଅଟୋ ଚାଳକ ଭୁବନେଶ୍ୱର ପୋଲିସ କଲୋନୀର ହେମନ୍ତ ସୁନ୍ଦରରାୟ ଓ ଅନ୍ୟ ଜଣେ ମୃତକଙ୍କ ପରିଚୟ ବର୍ତ୍ତମାନ ସୁଦ୍ଧା ଅସ୍ପଷ୍ଟ ରହିଛି । ଆଶିଷ ଦୀର୍ଘ ବର୍ଷ ଧରି ଭୁବନେଶ୍ୱରରେ ରହି ଛେନା ବ୍ୟବସାୟ କରୁଥିବା ଜଣାପଡିଛି । ଦୁର୍ଘଟଣା ପରେ ଘଟଣାସ୍ଥଳରେ ଅଟୋଟି କେନ୍ଦ୍ରାପଡା ମୁହାଁ ହୋଇଥିବାରୁ ଆଶିଷ ଆଳି ଗାଁକୁ ଆସୁଥିବା ସନ୍ଦେହ ଉପୁଜିଛି । ଏନେଇ ଅଧିକ ସୂଚନାକୁ ଅପେକ୍ଷା କରାଯାଇଛି । କେଉଁ ଗାଡି ଅଟୋକୁ ଧକ୍କା ଦେବା ପରେ ଦୁର୍ଘଟଣାର ଶିକାର ହୋଇଥିଲା ସେନେଇ ତଦନ୍ତ ଚଳାଇଛି ସଦର ପୋଲିସ ।
ଇଟିଭି ଭାରତ, କେନ୍ଦ୍ରାପଡା
