କେନ୍ଦ୍ରାପଡା: ପୋଲିସ କବ୍ଜାରେ ୫ ରାଜପଥ ଲୁଟେରା। ଦୀର୍ଘଦିନ ହେବ ୫୩ନଂ ଜାତୀୟ ରାଜପଥରେ ମାରଣାସ୍ତ୍ରରେ ଆକ୍ରମଣ କରି ଯାତ୍ରୀଙ୍କ ଠାରୁ ଓ ରାଜପଥ କଡରେ ଥିବା ଦୋକାନରୁ ତାଲା ଭାଙ୍ଗି ଲୁଟ କରି ଆସୁଥିବା ୫ କୁଖ୍ୟାତ ତଥା ଅଭ୍ୟାସଗତ ଅପରାଧୀଙ୍କୁ ଗିରଫ କରିଛି ମାର୍ଶାଘାଇ ଥାନା ପୋଲିସ । ଏହି ଅପରାଧୀମାନେ ଦୀର୍ଘଦିନ ହେବ ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇ ଆସୁଥିବାବେଳେ ଏମାନଙ୍କ ନାମରେ ପୂର୍ବରୁ ମଧ୍ୟ ସ୍ଥାନୀୟ ମାର୍ଶାଘାଇ ଥାନାରେ ଏକାଧିକ ମାମଲା ଥିବା ପ୍ରେସମିଟ କରି ସୂଚନା ଦେଇଛନ୍ତି କେନ୍ଦ୍ରାପଡା SDPO ରାଜୀବ ଲୋଚନ ପଣ୍ଡା।
ଗିରଫ ଅପରାଧୀମାନଙ୍କ ଠାରୁ ୮ଟି ମୋବାଇଲ ଫୋନ, ୨ ଟି ବାଇକ, ୪୫୦୦ ନଗଦ ଟଙ୍କା, ଗୋଟିଏ କଟର ବ୍ଲେଡ, ଭୁଜାଲି, କଟୁରୀ, ଚୋରି ହୋଇଥିବା ଗାଡିର କାଗଜପତ୍ର, ଗୋଟିଏ ରେଫ୍ରିଜିରେଟର, ଗ୍ରୋସରୀ ସାମଗ୍ରୀ ଜବତ ହୋଇଛି । ଏହି ଅଭିଯୁକ୍ତ ନାମରେ ମାର୍ଶାଘାଇ ଥାନା ବ୍ୟତୀତ ଆଉ କେଉଁ କେଉଁ ଥାନାରେ କେତେ ମାମଲା ରହିଛି, ତାର ଅଧିକ ତଦନ୍ତ ହେଲେ ଜଣାପଡିବ ବୋଲି ପୋଲିସ କହିଛି । ଏହି ଘଟଣାରେ ଅନ୍ୟ ଜଣେ ଫେରାର ଅଭିଯୁକ୍ତକୁ ମଧ୍ୟ ଖୁବଶୀଘ୍ର ଧରାଯିବ ବୋଲି କହିଛନ୍ତି କେନ୍ଦ୍ରାପଡା SDPO ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
