କେନ୍ଦ୍ରାପଡା: ଘରୁ ବାହାରି ମାତ୍ର ଦୁଇ କିଲୋମିଟର ଯାଇଛନ୍ତି ମାଡି ଆସିଲା ମତ୍ୟୁ । କେନ୍ଦ୍ରାପଡା ଜିଲ୍ଲା ସଦର ଥାନା ଅନ୍ତର୍ଗତ ଜଜାଙ୍ଗ ଖମାର କେଶପୁର ଗାଁର ଜଣେ ଦମ୍ପତ୍ତି ଘରୁ ବାହାରି କଟକ ଯାଇଥିବା ବାଟରେ ଏକ ଟ୍ରକ ଧକ୍କାରେ ସ୍ତ୍ରୀଙ୍କର ମୃତ୍ୟୁ ହୋଇଛି ।
ସୂଚନାଅନୁସାରେ,କେଶପୁର ଗାଁର ପ୍ରତାପ କେଶରୀ ଦାସ ଓ ତାଙ୍କ ସ୍ତ୍ରୀ ଶ୍ବେତପୁଷ୍ପା ବାଇକରେ କଟକ ଯାଉଥିଲେ । ଘରୁ ବାହାରି ମାତ୍ର ଦୁଇ କିଲୋମିଟର ଯାଇଛନ୍ତି କି ନାହିଁ ହଳଦୀଢିହ ଛକ ନିକଟରେ ତାଙ୍କ ବାଇକକୁ ଗୋଟିଏ ଟ୍ରକ ଧକ୍କା ଦେଲା । ଟ୍ରକ ଧକ୍କାରେ ଦେବା ଫଳରେ ଉଭୟ ଗାଡିରୁ ଛିଟିକି ପଡିଥିଲେ ।
ପ୍ରତାପକେଶରୀ ହେଲମେଟ ପିନ୍ଧିଥିବାରୁ ଅଳ୍ପକେ ବର୍ତ୍ତି ଯାଇଥିଲେ । ହେଲେ ଦୁର୍ଘଟଣାରେ ସ୍ତ୍ରୀ ଶ୍ବେତପୁଷ୍ପାଙ୍କର ମୃତ୍ୟୁ ହୋଇଥିଲା । 14ଦିନ ତଳେ ପ୍ରତାପକେଶରୀଙ୍କ ବାପାଙ୍କର ଦେହାନ୍ତ ହୋଇଥିଲା । ବାପାଙ୍କ ଶୁଦ୍ଧିକ୍ରିୟା ଶେଷ କରି ଗାଁରୁ କଟକ ଫେରୁଥିବା ବେଳେ ଏପରି ଦୁର୍ଘଟଣାର ଶିକାର ହୋଇଥିଲେ । ଏପରି ଦୁର୍ଘଟଣାରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ଖେଳିଯାଇଛି ।
ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭରକୁ ସ୍ଥାନୀୟ ଲୋକ ଅଟକ ରଖି ପୋଲିସ ଜିମା ଦେଇଛନ୍ତି । ଦୁର୍ଘଟଣା ସମ୍ପର୍କରେ ଅଧିକ ତଦନ୍ତ କରୁଛି କେନ୍ଦ୍ରାପଡା ପୋଲିସ ।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି,ଇଟିଭି ଭାରତ
