କେନ୍ଦ୍ରାପଡା: ମହିଳା ସବଇନସପେକ୍ଟର ନାମରେ ହତ୍ୟା ଅଭିଯୋଗ । ପଟ୍ଟାମୁଣ୍ଡାଇ ଆଦର୍ଶ ଥାନାର ମହିଳା ସବଇନସପେକ୍ଟର ଚନ୍ଦ୍ରିକା ମହାପାତ୍ରଙ୍କ ବିରୋଧରେ କେନ୍ଦ୍ରାପଡ଼ା ଏସପିଙ୍କ ନିକଟରେ ହତ୍ୟା ଅଭିଯୋଗ ହୋଇଛି ।
ଅଭିଯୋଗ ଅନୁଯାୟୀ, କେନ୍ଦ୍ରାପଡ଼ା ଜମଧର ଗ୍ରାମର ଅନୁସୂଚିତ ଜାତି ଯୁବକ ଦେବାଶିଷ ସେଠୀ ଓ ମହିଳା ସବ ଇନସପେକ୍ଟର ଚନ୍ଦ୍ରିକା ମହାପାତ୍ରଙ୍କ ମଧ୍ୟରେ ଦୀର୍ଘବର୍ଷ ଧରି ପ୍ରେମ ସମ୍ପର୍କ ରହିଥିଲା । ଚନ୍ଦ୍ରିକାଙ୍କ ପାଠ ପଢା, ଚାକିରୀ ଭଳି ବିଭିନ୍ନ କାର୍ଯ୍ୟ ପାଇଁ ଦେବାଶିଷ ଅର୍ଥ ଦେଇଥିଲେ ଏବଂ ଗତ କିଛିଦିନ ତଳେ ଉଭୟଙ୍କ ମଧ୍ୟରେ ବିବାହକୁ ନେଇ ମନମାଳିନ୍ୟ ହୋଇଥିଲା ବୋଲି ଅଭିଯୋଗ ହୋଇଛି ।
ଦେବାଶିଷଙ୍କୁ ବିବାହ କରିବାକୁ ରାଜି ହେଉ ନଥିବା ଚନ୍ଦ୍ରିକା ପୁରୀର କିଛି ବନ୍ଧୁଙ୍କୁ ଧରି ଗତ 3 ତାରିଖ ଦିନ ଦେବାଶିଷଙ୍କୁ ଯୋଜନାବଦ୍ଧ ଭାବରେ ହତ୍ୟା କରିଛନ୍ତି ବୋଲି ବୁଧବାର କେନ୍ଦ୍ରାପଡ଼ା ଏସପିଙ୍କ ନିକଟରେ ଅଭିଯୋଗ କରିଛନ୍ତି ଦେବାଶିଷଙ୍କ ମା’ । ଚନ୍ଦ୍ରିକାଙ୍କୁ ଶୀଘ୍ର ନିଲମ୍ବନ କରିବା ସହ ତାଙ୍କୁ ଓ ସହଯୋଗୀ ମାନଙ୍କୁ ଗିରଫ କରିବା ପାଇଁ ଦେବାଶିଷଙ୍କ ମା ଭଗବତୀ ପୋଲିସ ନିକଟରେ ଦାବି କରିଛନ୍ତି । ଏପଟେ ରାଜ୍ୟ ଏସସି ଏସଟି ସେଲ ସଙ୍ଘ ସଭାପତି ହଳଧର ସେଠୀ ମଧ୍ୟ ଏସପିଙ୍କ ନିକଟରେ ସମାନ ଦାବି କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
